اريد طريقة البيتزا

[طيف]

اريد احد يعطيني طريقة عمل البيتزا بس تطلع العجينة مضبوطة وتكون مجربة على المقادير

[ماليزيا الخضراء]

تفضلي أختي

http://www.s-oman.net/avb/showthread.php?t=285627

موضوع الأخت (التقى)

تحياتي

[Muscatmylife]

هلا اختي .. تريدي عجينة لينة وهشة وسريعة الطبخ وتذوب في فمك .. خذي هذه المقادرير

- ( 3) أكواب طحين ميدا ( رقم 1 ) وزين لو تشخليه شوي
- نصف كوب زيت عادي مال الطبخ
- نصف كوب سكر
- ملعقة كبيرة خميرة
- ملعقة صغيرة بيكنج بودر
- ملعقتين صغار حليب بودرة مذوبة في كوب ماء دافئ
- ذرة بسيطة ملح طعام
- بيضة واحدة
هذا بالنسبة للعجينة .. مع العلم ان هذه العجينة تنفع لكل المعجنات ( الفطائر وخلية نحل ... )

اما فيما يخص الطبقة السطحية فهذا من اختيارك .. انا مثلا على السريع احب استخدم ما يلي :
- قطع صغيرة زيتون اخضر أو أسود
- قطع صغيرة دجاج مقلي أو مقانق أو لحم حسب الرغبة
- قطع صغيرة فلفل رومي
- قطع صغيرة بصل ( طبعا حسب الرغبة )
- قطع صغيرة مشروم ( حسب الرغبة )
- واخيرا جبنة الموزيرالا المعروفة للكل
- كما يمكنك اضافة المورتديلا اذا رغبتي

الطريقة :-
- ذوبي السكر والخيميرة في القليل من الماء الدافئ قبل اضافته للطحين
- وهات الطحين واضافي فيه الزيت والبيض والملح والبيكنج بودر وخلطة الخيرة والسكر واخلطيهم بيدك مع اضافة الحليب على مراحل شوي شوي .. وعجيني بايدك الحلوة لغاية ما تحصلي العجينة لينة جدا في ايدك .. لزجة شوي تمسك في ايدش .. وغطيها بورق المونيوم او الشفاف وحطيها في مكان دافي لمدة ساعة وبتحصليه منتفخ وحلو على طول .

- خذي قطعة من العجين مع التأكد على عدم عرض الطحين الموجود في الحلة عندك للهواء حاولي تأخذي كمية وتغطي البقية بسرعة علشان ما تنشف .. فهمتي علي.
-وبعدين افردي العجينة واعملي دوائر بالحجم ايلي ترغبين فيه ..وهات صينية الفرن وامسحي فوقه بالسمن وحطي العجينة ايلي انت شكلتيها على الصينية وحاولي تغطي لمدة 10 دقائق قبل ما تحطي أي شي عليه .. لانش طلعتي الهواء يلي في العجين وانت تشتغلي عليه ... فخليه علشان تنتفح وتتخمر مرة ثانية أي ترتاح مرة ثانية وبتحصلي العجينة انتفخت مرة ثانية .

- وبع ما تحصلي العجينة جاهزة تكوني انت مسخنة الفرن شوي على درجة حرارة متوسطة .. وهات الخضروات والاشياء ايلي ذكرناها فوق وحطيهم على العجينة واحدة واحدة وحطي فوقهم جبنة الموزيريلا .. ودخليهم في الفرن على حرارة متوسطة ولمدة 10 دقائق فقط لان العجينة لينة وهشة وما تحتاج طبخ كثير وبتحصلي استوى وبسرعة وتأكدي انه ما احترق من تحت أول ما تحصلي انتفح طلعيه على طول.

- وتقدري تقدميه مع الخبز بالثوم يبيعونه في السوبرماركات والبطاطس المقلية وبالعافية

[Muscatmylife]

نسيت اخبرك قبل الخضروات واللحمة وغيرها حطي على العجينة صلصة البيتزا أول شي على العجينة اذا ما في حطي كاتشب مثلي وبتطلع شي

[شيخة شموخ العز]

أنا أفدت بعض البنات قبل ف موضوع ثاني



الغاليه اول شي لا تنسي

المقادير هي
3 اكواب طحين
2 اكواب حليب بودر
ملعقة ملح ونصف
ملعقة خميره ( ذوبيها )
3 حبات بيض
كوب زيت
........


اخلطي السوائل مع بعض زين زين
وبعدين ضيفي عليها الحليب البودر كوبين
وبعدها حطي الطحين شوي شوي لحد ما تخلصيها

يعني ف العجن حتى بإيدك انا دايما اسويها بيدي وبلا مكائن
استخدمي خلاطة البيض من البدايه مع الزيت والبيض والملح وشوي ماي وضيفي عليه الخميره اللي ذوبتيها من قبل ف ماي ..
واخلطي لحد ما تشوفي الخليط تماسك
تاليها ضيفي الحليب واخلطيه بنفسها خلاطة البيض اليدويه

وتاليها ضيفي كوب طحين وانتي تخلطي بالخلاطه اليدويه

واخلطي العجين بيدك لحد ما يتماسك وخلااااااااااص خليها تخمر ..

هذي الطريقه طبعاً ع شان العجينه تنتفخ فلازم المقادير تختلط ببعض زين

أهم شي لا تكثري من الخميره ملعقة شاي كبيره تكفي لأن بعدين نكهة الخميره بتظهر ف طعم العجينه وبيكون ما حلو طعمها








ومكونات خلطة البيتزا
ع شان تطلع البيتزا حلوه لا تستخدمي الكاتشب
استخدمي معجون طماطم وزيدي عليه شوية ملح وشوية زيت وسخنيه ع النار شوي..
لأن السكر ما حلو ف البيتزا !!!
والبصل قطعيه شرائح دائريه
والفلفل الرومي قطعيه شرائح طوليه صغيره شوي أو دائرية
واذا تحبي البيبروني ضيفي شرائح البيبروني مع البيتزا بتطلع حلوه ( نفس اللي بالصوره )
وطبعاً حطي شرائح الزيتون الاسود
واذا حبيتي شوي قطع مشروم حسب اللي يحبونه

وتاليها بس حطي جبن موزريلا ( المراعي او اي حاجة غير )
وراح تطلع ولا أروع بيتزا

نفس بيتزا هت ودومينوز




وافطاراً شهياً..