الذهب كيف تشتري وكيف تبيع...إقرأ بتستفيد

[Bin Laden]

السلام عليكم ورحمة الله وبركاته
يمكن الموضوع قديم ومتكرر بس قلت اكتب عنه
سعر الذهب الكثير تتلاعب فيه وممكن ينضحك على كثير من الناس لما يروحون يبيعون ذهبهم او يشترون جديد..
من الحاجات المهمة هي التولة والكثير ما يعرف شو هي..بالمختصر

التولة = 11.664 جرام احفضوا الرقم

البائع يقول سعر التولة 170 ريال وغيره يقول 175 ريال وهذا طبعا سعر الذهب الجديد لأن البائع ما يذكر سعر الشراء (لما تريد تبيع ذهبك له)

كمثال:
سعر التولة 170 ريال والتولة 11.664 جرام يعني سعر الجرام الواحد 170 / 11.664 = 14.570 ريال

انت تشوف كم جرام وزن ذهبك وتضربه في سعر الجرام الواحد ويطلع السعر الخاص بذهبك
هذا اذا كنت تريد تشتري

أما اذا كنت تريد تبيع المفروض تنزل القيمة شوي بمقدار 700 او 800 بيسة فقط وهي سعر الشغل (شغل الذهب أو تصنيع الذهب)

البعض من الباعة ينصبون في هذا ويخلونه اكثر من ريال ولو حسبتها بتلقى المبلغ يفرق كثير

ما ننسى شغلة ثانية وهي ان بعض الذهب فيه فصوص
اذا كانت الفصوص صغيرة ومو كثير ينزلوا وزن الذهب من نص جرام الى 3 جرام تقريبا اما اذا كانت الفصوص كبيرة ينزل الوزن الى 5 او 6 جرام او اكثر
في رأيي افضل حاجة لا تشترون الذهب اللي فيه فصوص؟؟؟ ليش؟
لأنه بيحسب لك سعر الذهب بوزن الفصوص ولما تجي تبيعه يحذف وزن الفصوص وكذيه بتخسر... يعني ينصب عليك وانت تضحك وراضي..

وخلوا بالكم من شغلة ثانية اهم
الذهب انواع:
ذهب 18 وهو غير مرغوب كثير
ذهب 21 أحسن منه
ذهب 22 وهو الافضل
كيف تعرفونه؟؟؟
ذهب 18 ينعرف من لونه احيانا لأنه قديم يعني اللي عنده ذهب من ايام الاجداد فهذا ذهب 18 لونه يميل شوي للبني
ذهب 21 و22 مختوم عليه من الخلف اذا عندكم عدسة شوفوا من داخل الذهب لازم يكون هناك ختم وإلا هذا الذهب مغشوش او تهريب او اي شي ثاني..

سعر الذهب 22 اعلى من 21 ويفرق تقريبا 2 ريال وهذي نقطة الكثير ما ينتبه لها لما يروح يشتري او يبيع لأن السعر يفرق في العملية الحسابية

للتذكير مرة ثانية:
سعر التولة = 11.664 جرام
نوع الذهب ان كان 18 او 21 او 22

اذا فيه معلومة ثانية أو خطأ ارتكبته في كتابتي للموضوع الرجاء تصحيحه وخاصة من الجماعة المحترفين في بيع الذهب
تحياتي
بن لادن