ஓ كل عام والهجرة تذكرنا بهجرة الغايب...يامحمد ஓ

[أميـــــــــرة القنــــــــــاديل]

تبكيك يامحمد جدران بيتنا وطوبه
سكيك الحاره ومدايس خطوتك

من عشر سنين يامحمد
رايح تصلي الظهر
وماشفناك من يومه

عشر سنين تصلي الظهر!!
يا أواه يا غايب

يامحمد
انا الصغرى تذكرني؟!

ملاذي حضنك الدافي
واكتافك
خلاص ماعاد تحملني
انا طولك!!
انا الصغرى!!
انا الحين دكتوره!!
وانته يابعد هالقلب
اخبارك عنّا مقطوعه

يامحمد

تُرى هل باقي في جسمك
دقات قلب مسموعه

يا محمد

اذا مليت من هجرك
غرفتك مثل اخر يوم محفوظه
نظارة وفردة نعالك
وبطرف الكرسي دشداشه
ريحتها مابقى منك
وسريرك كن البارحه سبته
حتى في مخدتك بعجه
من ضغط راسك محفوره

يا محمد
وانت طالع نسيت ساعتك
على المغسله متروكه

رايح صلاة الظهر
غداك في الصاله من يومه
لحد اليوم يامحمد
نترقب هالبيبان
تكحلنا بالشوفه

مضينا بعمرنا كلنا
تذكر نرجس الزهره
صار عيالها طولي
ولاالشقي منذر
بعد كم يوم
يصير معرس
وانته صورتك ثابته

يامحمد
ابيك تبث فيها الروح
ابي ترجع تفهمني
وينك يوم منذر يسرق ألعابي
وانااصرخ

يامحمد
يامحمد

ويصرخ منذر بصوته
يامحمد تعال تكفى وعنفني

ابيك بس تفهمني حصة الاملاء
لية عشر سنين مقطوعه
تعال شوفني اكتب
ماعاد اغلط التوبه

حتى ابوك يامحمد
قطعته
ماجاك خبر موته!!
لو تدري
عند المغسلة روحه
تتمنى اكبر عياله حامل طوفه
لاخر لحضه والجثمان ينكسي ثوبه
يبيك تجيه وتتعذر بفاتحه لروحه
لحد الامس يامحمد
حلمته يعاتبك
زوره

يامحمد

ابي اشوفك
ابي ارسم صورتك
ملامحك عني محجوبه
عييت اني اكبرها
عييت ارسمها هالصوره
شعر راسك
لون عينك
همس صوتك
صورتك ابيض واسود
عجزت الون صوره معطوبه

يا محمد

انا بكره بتخرج
ابيك ياخوي تنطرني بباقة ورد
وحضن منه محرومه
وبلا كلافه
عرس منذر تكون
اول حضوره