أخوي يريد يقتلني!!! ـــــــــــ تم التحديث

[العقاري]

انا ما أمزح..

بأخبركم السالفة من بدايتها..

اليوم قمت قبل الفجر تقريبا الساعة 04:25 فجرا وعلى طول رحت المطبخ علشان اشرب الدواء لان راسي كان مضغوط..

المهم حصلت باب المطبخ مغلق بالمفتاح!!!

وحصلت الوالدة صاحية تقرأ القرآن فسالتها ليش المطبخ مغلق!! إستغربت وقالت ما تعرف ليش!!

رجعت وفتحت المطبخ وكان على بالي احصل في المطبخ حرامي! او كلب! او قطة! بس حصلت المياه على الارضية!!

المهم شربت الدواء وجهزت نفسي ورحت المسجد..

لما رجعت وجلست مع الاخوان.. قالي واحد من اخواني (كان سهران يشوف كورة) انه امس في الساعة 02:15 ليلا سمع صوت في المطبخ.. راح يشوف مو هناك؟؟ حصل اخوي الصغير في المطبخ ورايح صوب خزانة الملاعق والسكاكين

طلع انه يمشي وهو نايم!!

والغم جالس يردد اسمي
والمصيبة انه مآخذ سكين.. لا وبعد اكبر سكين موجود في الدرج!!

الحمدلله انه اخوي شافه واخذ عنه السكين وغلق باب المطبخ بالمفتاح..

طبعا جلست امازح الوالدة اخبرها يا تشتروا كفن حالي.. او تشتروا حبل حال اخوي اربطه

عاد تو بتجيني هستيريا كل ما اروح انام !! انا مو يخصني اذا هو يحلم بكوابيس ضرابة وحرب وقتل واغتيالات!!

انتوا صار معكم ذي السالفة؟؟
واجهتوا مثل هذي المشكلة؟؟
كيف حليتوا هذي المشكلة؟؟

واتمنى من الجميع يسامحني اذا غلط عليه عاجلا او اجلا

ونصيحة غلقوا باب المطبخ وخلوا السكاكين والاشياء الحادة بعيدة وفمكان مرتفع

الخلاصة..

هذي النتائج اللي استخرجتها من مشاركاتكم ونقاشاتكم جمعتها باختصار وحبيت اظيفها فالبداية حتى نستفيد منها كلنا

الحمد لله على كل حال.. من هذي التجربة نتعلم اخطائنا.. وكيف نعالجها وكيف نتجنبها قبل وقوعها..

وهذي فرصة أنصح نفسي وانصحكم بالاتي (هذي النصائح من مشاركاتكم بارك الله فيكم):

1- قراة المعوذات واية الكرسي قبل النوم
2- غلق المطبخ واماكن وجود الاشياء الخطرة
3- الابتعاد من عروض القتل والعنف سواء من التلفزيون او الالعاب او حتى الكلام

طبعا هذي النصائح تشمل الجميع الصغير والكبير انا وانته وانتي.. لاننا كلنا معرضين لهذا الخطر سواء كنا الضحية.. او الجناة.. لان من تجاربكم اثبتم ان حتى الكبار تجيهم هذي الحالات.. يمكن بكرة انته او انتي نحملي السكين!!

واذا عندكم اي نصيحة اخرى مفيدة فلا تبخلوا بها..

وخلونا من اليوم نغير نمط الحذر.. من اليوم نبدا نطبق النصائح الثلاثة تماااااام


وااشكر لكم تفاعلكم

إضافة

حبيت اضيف هذي الردود واللي منها نستنتج ان مثل هذي الحالة لا تقتصر على الاطفال فقط.. بل تظهر ايضا فالرجال والنساء سواء الكبير منهم او الصغير.. وايضا الضرر ليس مقتصر من المطبخ فقط كما بينته الردود.. بل يطال الامر الى الخروج من البيت!! سبحان الله

أرسل أصلا بواسطة غدار الليل

ود عمي يقوم ويمشي وهو نائم ويدور في السيوح
ويرجع ينام يوم يقوم الصبح يشوف اثار كدمات في رجوله
ويدينه ....تقول مغيب

أرسل أصلا بواسطة دانه ظفار

سبحان الله هاذي الظاهره منتشره وقد سمعت في بعض الاطفال
يغسلون ملابسهم وبعضهم يتحاورون بصوره طبيعيه وفي الوقت نفسه هم
لا يزالون نايمين واحيانا تكون محزنه وكيئبه وتحدث المصائب
وتسمى هاذي الحاله بالاظطراب الحركي والتي تسبب بظاهر المشي عند النوم
والتي نتيجتها الكابوس والاحلام المزعجه والخوف ووالرعب الليلي
واكثر وقت تحدث فيه بين الثالثه والرابعه فجرا
مضاعفاته تودي الى القلق والخجل الا جتماعي
علاجه بعض الحالات تزول بعد سن المراهقه من غير مضاعفات تحتاج فقط اخذ الاحتياطيات والحذر

أرسل أصلا بواسطة حكاية حياه

انته بربك
ربيعتي مره وحده نهضت فالليل ...
وتفاجأت إن أختها ما موجوده معها في الغرفه ..
راحت تخبر أمها وأبوها نص الليل ...
وقاموا يدوروها ...
وحصلوها في الخوير لا إرادي تمشي وهي نايمه
والله اعلم ما سبب هذا المرض ...

أرسل أصلا بواسطة بنت الحواري

عاد انا مره ولدي صحاني باليل وشال فراشه معاه وقالي مع السلامه انا رايح انام في الشارع
وحاولت امسكه وارده مكانه بس يضارب ويقاوم يقولي لالالالا خلاص لازم اروح
وقريت عليه قرأن وهديته لحد ما نام
ومره قام يريد يروح حمام باليل بس حصلته داخل الثلاجه يريد يسويها هناك
تخيلوو!!

أرسل أصلا بواسطة leadybeard

قصة رائعة جدا ..

عندنا فرد فالعائلة يمشي وهو نايم وأحيانا يجيبوه من خارج البيت يكون عاد واصل بعيد ..

لهالسبب صاروا يقفلوا الأبواب زين زين حتى ما يفاجئهم ويطلع ..

بصراحة حالة عجييييبة

أرسل أصلا بواسطة روح طفله55

الحمدلله ع السلامه
مره الفجر صحينا وما لقينا أخوي الصغير ف الفراش دورناه حصلناه داخل الكبت لا أنه كان راقد ف الفراش
سبحان الله محد يعرف هش سالفته

أرسل أصلا بواسطة تسنيم-5

ذكرتني بولدي مرات يضحك بصوت عالي او يصيح في نومه وفي الصباح لما أسأله يقول ما اذكر
اطفال اليوم ما تعرف كيف تتصرف معهم سواء نايمين او صاحين تخاف عليهم في كل وقت من كثرة ما رازين عيونهم على رسوم وبلايستيشن

أرسل أصلا بواسطة ام هايدي

بنت خالي تقوم تسرح شعرها وترجع تنام كانها ما مسويه شي

وما عندها خبر ابدا بالدنيا

ومرة قامت صفعة اخوها ورجعت تنام

ومرة حصلوها عند باب الحو ش مع البرنوص مالها

أرسل أصلا بواسطة شرف البلد

مرة ولد عمي دهمان قام شل كورة ورماها بقوة على راس أخوه ورجع ينام

أرسل أصلا بواسطة Dj COOL

هـــــذي ماشي منـــــــه...قويه


انا اتذكر لما كنت صغيـــــــر...

اهلي ما حصلوني فالبيت...وقلبو البيت فوق تحت
وما حصلوني

وطلعو يدوروني من خارج...حصلوني فالدكااان اشتري مسواااااااك
ههههههههههههههه

الي اليووم اتذكرها الحاله الكسيفـــــــــــة

واحيانا اسمع فالليل وقت متاخر.. حد يضرب جلص...واروح اشوف ...وما احصل حد


حلاااااااااات وستايلاااات
بس تعطيك نشعــــــــــــــة