المرافق العامه ( دورات المياه)

[من يرضي غروري]

صباح الخير اعضاء السبله
اتمنى انكم تكونوا في احسن حال والله يديم عليكم الصحة والعافية

بصراحه انا مستاءه جدا جدا من وضع المرافق العامة في بلادنا وبالتحديد (دورات المياه العامه) الله يكرمكم.....

أمس طلعنا رحله مرينا فيها على ولاية نزوى- الحمراء- جبل شمس

نبدا بنزوى وطبعا محد يقدر ينكر مكانتها و طيب اهلها

للاسف مرينا على اكثر من دورة مياه كلها تشكي من الاوساخ والقاذورات الموجوده فيها واللي استغربت منه اكثر و دهشني منتزه فلج دارس اللي كل من يمر بولاية نزوى لازم يحط هناك الله المستعان من المرافق اللي فيه انا طبعا اتكلم عن تجربتي لما دخلت دورة مياه النساء بس هذا لا يعني ان المخصص للرجال نظيف (طبعا لا) لاني سمعت من اخواني عن دورة مياه الرجال..
وين دور بلدية نزوى في هذا الشي وين السياحة اللي لازم تثري في عمان ؟؟؟؟!!!! كلها اسئله نحتاج ندور على اجابة لها؟؟؟؟!!

طبعا هذا ما راح يكون دور البلدية بس لان عندنا اهالي وناس من اهل البلد يمروا على المكان و لازم يحافظوا على نظافته لان مو بس هم اللي يستخدموه في سواح و زوار من كل مكان يمروا هناك لكن انا ارجع واقول في ناس ما تعرف كيف تتعامل مع هذي المرافق وفي ناس مهمله لانها محصله كل شي بالمجان وما تعبانه فيه عشان كذي اكيد ما راح تحافظ عليه

بين الحمراء و نزوى ما وقفنا في اي مرفق عام بس عرفت انه يوجد بلدية في الولاية يعني شي اكيد اي مرفق عام يكون تحت اشرافها وما اعتقد راح يكون نظيف او احسن من اللي شفناه الله بالستر بس

وبعد الغدا والاستراحه شوي توجهنا الى جبل شمس طبعا اللي يعرف واللي ما يعرف هناك في استراحة فالجبل متوفر فيها دورات مياه وغرف للايجار والمكان اكثر من رائع والبرد كثير
بصراحه الاستراحه خاصة وملك لمستثمر اجنبي عشان كذي انا شفت المكان كثير نظيف و مرتب و المرافق اللي فيه نظيف جدا جدا كنت اتمنى ان اي من اللي مرينا بيهم كانوا في مثل هذي النظافة او بس بربعها 4/1

بصراحه عندي اقتراح لو البلدية تسوي مثل كثير من الدول وتخلينا ندفع فلوس عشان نستخدم دورات المياه والله راح تشوفوا ان الناس بتبدا تحافظ على المكان لانه مو بالمجان و تحس بقيمتة اكثر

اسمحولي على الاطاله بس والله كاان فيني قهر من اللي شفته هذي بلدي وما احب اشوف اي شي بسيط يشوه من اسمها