[ مسابقة ] حياة موظفة كحيانة

[النجلاء]

بسم الله الرحمن الرحيم

بخبركم عن موضوع بسيط. ..يخص موظفة كحيانة.فقيرة .من الدوام للبيت.ومن البيت للدوام.ما عندها السيرة يمين ولا يسار ولا التمشية في الشوارع ولا غيره المسكينة من ترجع من الدوام أتهيس هياسة في شغل البيت.لين ما تنام.وهذا جدولها طوال حياتها.
حصلت ترقية بسيطة في دوامها.فرحت مسكينة وراحت تبشر الأهل عن ذا الترقية.فرحوا واجد وعاد طلب أبوها تتسلف من البنك.سلفية معتبرة وعلى أقساط طويلة
المسكينة راحت في اليوم الثاني وقدمت الطلب وعطوها بالمرة وحصلت على القرض المطلوب.والأقساط حدث ولا حرج ..عاد ما يكسر الظهر وبس قول يقص نص العمر البنت عطت أبوها المبلغ الفلاني بالكامل .قام الأب عدل منه البيت ورمم شوية وبعدين أشترى سيارة غاوية حاله وكملها بسفرة للخارج يغير الجو ويرمم شبابه قصدي يعيد شبابه إلي أوين ضاع منه ..ورجع من هناك مستانس على الآخر.
بعد أيام جاء معرس حالها البنت.والأب طلب منها توافق مع إن البنت رافضة الزواج بشخص لا شافته ولا تعرف عنه شي .ياخي تعال وتزوج مو الدنيا فوضى بس الأب لزم عليها توافق وما في عنده بنات يتمنكرن وما يسمعن الكلام
البنت تزوجت من ذا الأنسان الغريب ومن أول يوم شافته ما طبيعي يترنح يمين يسار كإنه تاير عربانة خربانة .. خافت المسكينة وأكتشفت يا حليلها أنه يتعاطى الخمر وعاد ما بلية أستبلت به البنت

قام يصبح عليها بالضرب ويمسي عليها بكرخة إذا قالت له: مازين ذا بو تشربه حرام
راحت تشتكي حال أبوها وعيونها وارمات من الصياح وخبرته إنه ضربها علشان ما عطته الراتب كله..رد عليها أبوها: هذا زوجش تحملي .قالت: زوجي يتعاطى الخمر رد عليها أبوها : هذا إبتلاء وصبري عليه تراه زوجش . قالت: ما أبغاه أريد أتطلق منه.. قال أبوها وهو يصارخ : ما في عندي بنات يتطلقن.. قالت المسكينة : ما أتحمله البررر أنت أبوي كيف زوجتني حاله وهو أكبر مني وطلع بعد يشرب خمر رد عليها أبوها: كان مهرش ما شوية ..
رجعت لبيت زوجها تبكي المسكينة.تفكر واجد ..من هناك الأقساط بو قاص ظهرها ومن هناك ذا الزوج إلي يذلها ذل وما راحم عمره
بعد كمين يوم جاء زوجها معصب أوين باغي زوجته تتسلف فوق سلفيتها.والبنك رافض.وراح يتضارب حيت أبوها ..وقال له: حامو أنت دبست بنتك بسلفية تو أنا باغينها تتسلف حالي وما قادرة..
دوكم ذا بو قاصر..أوين باغي يسوي مشاريع حال لعبه وخرابيطه عاد أنتو فهموا لااااه
تضارب الأب والزوج وقام الزوج طلق زوجته وقال حال أبوها : دوك بنتك خليها حالك كلها ديون بروح أتزوج واحدة غيرها أحسن لي وتقدر تضرب حالي ذيك السلفية الغاوية
مسكينة البنت تطلقت وجلست في بيت أبوها.وعاد هوما مقصر كل يوم يتنازع ويتقمقم عليها ..وسحب عنها السيارة.. أوين تو إنتي مطلقة بيتكلموا عنش الجيران. .. وضربها بيعة ذيك السيارة الغاوية ..وما يخليها تطلع إلا معه يوصلها الدوام ويرجعها..ماشي سوق..ماشي زيارة صديقات..ماشي ...الخ
ياخي القائمة طويلة ما أقدر أكمل
بعد سنة طلب منها أبوها تتسلف سلفية غيرها وأتسلفت المسكينة وعاد أنتو تعرفوا مو سوا بالسلفية حاله وحال لعبه ...
وجاء رجل يبغى يتزوجها..واحد شيبه أتقول رجوله شوية والقبر ...يعني دفرة ويموت ...وزوجها أبوها حاله وهي رافضة..بس مو بتسوي قدام كلمة أبوها.أوين أنتي مطلقة من يتزوجش تو..وهذا دافع المهر الفلاني.يعني ما شوية

تو معقولة تصير ذي حالة البنت في ذا الأيام...من طمع لطمع ومن يد رجل ما يخاف الله ليد رجل شايب محتاج للممرضة ما للزوجة ..الله يعينا والله من ذي الحالة ياخي والله قهر لااااااااه

عاد سمحو لي تراني كتبته بسرعة قبل ما يقفلوا المسابقة ..عاد أنا وحدي ما أعرف أمخمخ مثلكم يا خي