بعيدا عن الطبخات ..^-. رسمت على الشيله تفضلو قيموا.-^ (تم إضافة التفاصيل )

[يا هلا]

هلا بنااات
محسوبتكم تشتغل معلمه وتعرفوا عاد وضعنا هلايام .. متقابلييين لا شغل ولا مشغله فقلت ليش ما ارسم على الشيله .. اجرب لان العام الماضي معلمة فنون تشكيلية علمتنا كيف نرسم على الشيل .. والدرس نفس درس الاخت (حمامه) ف المنتدى

ورسمت ..
وعاد اريد رايكم بصراحه
وطبعا السالفه سهلة جدا
والنتيجه حلوة
او اعتقد حلوة

هنا في طور الاعداد



هذي النتيجه





شو رايكم ..؟



بنات بحط لكم الادوات والطريقه والنصائح الي تعلمتها بس انا ما عندي خبرة ولكن بقولكم الي اعرفه وهذا نزولا عن رغبة البنات
شي ثاني اشجع كل بنوته عندها وقت فراغ تسوي سواء تعرف ترسم او ما تعرف لان السالفه جدا سهلة وانا وزميلاتي طلعنا بشي جميل من اول تجربه والحمدلله

اول شي الادوات :

1- شيله انا رحت محل بيع عبايات وطلبت شيله سادة برج الامارات وكانت ب ريالين ونص .. في سوق السبله بتحصلو يبيعو بعد

2- طوق خياطه >>> عاد ما طوق المهم مثل الصورة


3- كربون من محل ادوات خياطة (غفور مثلا ) >>> هوه فيه غيييرو


4-فصوووص للتزيين >>> كيكة مب شيله خخخ

5- الوان من محل اسمه ( شاه نجرداس منجي) انا شريت من فرعهم الي ف روي جنب محل شوز فور اس وسمعت انه موجود ف القرم التجاريه مقابل سابكو
الالوان مكتوب عليها
(colors for fabrics)
انتوا سألو عن الوان قماش لان نفس العلبه فيه للزجاج
في بلمعه وهذا صورتها

وهذا بدون لمعه وهذي الصورة _ بنات الالوان حجمها صغير ما مثل ما واضح في الصورة

سعر الواحد ريال و3ميه تقريبا

6- المحدد او الريليف فيه ذهبي وفضي واسود من نفس المحل
هذي صورته نفص الشي حجمه صغير يجي مثل حنا الاظافر



7- فرشاه من نفس المحل او حتى من مكتبه او رامز(على راحتكم انا ما عندي خبرة بس الضعيفه والعريضه كله ينفع)


8- رسومات اكتبوا في جوجل باترونات للرسم او باترونات للرسم على القماش وحمللي الصور وطلعي برنت



اضفت ملف مضغوط فية ملف وورد لشوية باترونات ممكن تستخدموها

ملاحظه :
ما شرط تشفي كل الرسمه انت مثلا تختاري الفراشه وتكرريها في اماكن مختلفه من الشيله

الصور لادواتي وادوات زميلاتي >>> للامانة التصويريه والممتلكاتيه خخخ

بعد ما جهزنا الادوات نبدأ العمل

ما عندي صور للخطوات وما شتغلت على شيله جديده بس بحاول افهمكم ستب باي ستب

1- تختاري الرسم المناسب

تحددي او تقرري وين بتحطيها .. على الزاويه او في النص فوق او تحت

فرشي الشيله ..

خلي فوقها الكربون طبعا الجهة الملونة على الشيله

جيبي الرسمه وخليها فوق الكربون

يعني شيله فوقها كربون وفوقهم الرسمه

خذي قلم ومشي على الرسمه ما تتوقفي او تقطعي ليييييش لان ينطبع على الشيله

لما تخلصي شيلي الورق والكربون

وش صار؟ انطبعت الرسمه على الشيله تمام ؟

ناخذ الطوق

ونفتحه ونحط الشيلة الرسمه يعني على الطوق ونسكر ليييش؟ عشان تبقى مشدوده مثل الصورة الي في بداية الموضوع

نجي للخطوة الصعبه .. المحدد لان المحدد مثل الحنى واحتمال ترتجف ايدك
خذي المحدد ومشي على الرسمه بهدوء وبشويش وحاولي ان ما يتقطع واذا تقطع ما مشكله كملي ,,اول تجربه يتقطع انا وايد تقطع معي

لمل تخلصي خليه يجف ,, كذا ربع ساعه

اختاري الالوان
كبي شوي من الالوان في كوب صغير او غطا ماي مثلا .. بس انتبهوا ليشييين

1- ما تضيفي ماي للالوان
2- علبة الالوان دايما خليها مسكرة حتى ما يجف لانه يجف بسرعه


تأكدي ان المحدد جف ونشف بدي بالفرشاة لوني وتسلي بالتلوين

صديقتي تلون وتحطه يجف وتعيد عليه مرة ثانية والنتيجه تطلع احلى واحلى

انا لونت مرة وحده بس

اتركيه يجف يمكن تاخذ وقت ..

لما تتاكدي انها جفت ... خلااااص شيلي الطوق

وخذي الشيله حطي فوقها لحاف ..(ليسو) فوق الرسم واكوي عشان يثبت الون وبعدها اكوي الفصوص

وتم بحمد الله

بنات الشرح اخذ مني وقت وجهد >>> الله والوقت والجهد اتمنى تستفيدوا ودعواتكم لي الله يحقق لي ما اتمنى وان شاء الله الملك يقولك ولك مثله واي سؤال انا حاااضرة وبحاول اصور لكم خطوات العمل اذا اشتغلت على شيله جديده