[المصمم]

السلام عليكم

اشرت في موضوع للأخت بعثرة مشاعر عن مشكلتها مع وكالة الهوندا بأنني سأقوم بكتابة موضوع عن معاناتي مع وكالة الهوندا .. واتمنى من كل من لديه سيارة هوندا أن يقرأ الموضوع كاملاً .. ما عليه تحملوني شوية .. بس لأني اريد الجميع يستفيد من تجربتي

بداية أنا عندي هوندا أكورد موديل 2004
في شهر يناير الماضي وأيام الأمطار والمنخفض الجوي .. بالتحديد أيام كأس الخليج ..
خرجت أنا والأهل بالسيارة نتمشى في الجو الغائم .. المهم شاءت الأقدار أن ندخل في منطقة منخفضة قليلاً تساعد على تجمع المياه ولكن لم تكن بالانخفاض الغزير .. إلا أن الله قدر لنا أن ندخل فيها .. وشوي شوي أشوف المياه بدأت ترتفع والسيارة مقاومتها تقل .. والمسافة كلها أصلاً ما تجي أكثر من 50 متر اللي فيها الماي .. والماي ســـــاكـــن .. والله شوي وأشوف الماي عاد فوق البونيت .. شوي وتبند السيارة .. شوي ويدخل الماي من الأبواب .. وهذي النقطة الأولى اللي أسجلها على التصنيع ( الربل لا يحجب الماء ) .. وترس المكان داخل بالماي .. إلى منتصف الساق تصوروا !!!

واحنا وسط الماي .. تذكرت أيام جونو ..

عموما جو اطفال صغار لا تتجاوز أعمارهم 11 سنة ودفوا السيارة لحد ما طلعوها برع واحنا فيها .. عادي دفوها لأن الماي ساكن والطريق قار

ولما طلعنا من الماي كذي على صوب أتفاجأ بسيارة نفس النوع نفس الموديل لشباب رقم امارات بنفس المشكلة

هو ينزف الماي في صوب وأنا انزف الماي في صوب

الخلاصة حاولنا نشغل السيارات ما طاعت تشتغل .. وطاح تغيير البطاريات .. والمحاولات

الخلاصة ان سيارتي مع المحاولات وزيادة دق السلف .. انكسرت المكينة ( أو كسروها في الجراج اللي وديته )
عموماً .. بدلت المكينه وركبت الجير .. أول يوم عادي السيارة اشتغلت وعزم المكينة ممتاز لأني اشتريتلها مكينة من سيارة مكنسلة موديلها 2006 أو 2005 وفعلا لاحظت هالشي في عزم السيارة ورحت بها مسقط ورجعت

بعد يومين اشوف تغييرات الجير ما طبيعية رجعتها الجراج قالو الجير خربان .. قلتلهم إن شالله .. سادني خربتو المكينة .. عاد أوين شليتها الوكالة وخلوها معهم 4ايام لأنه صادف الخميس والجمعة .. وخبرتهم بسالفة الماي وتغيير المكينة. وطلبت منهم فحص كمبيوتر شامل للسيارة

المشكلة الحالية هي: ان الجير ما يغير في أماكنه والسيارة تزر ... تعرفو ايش جاء في التقرير؟

1- مشكلة الجير سببها الماي ويمكن الكمبيوتر لحقه ماي .. يحتاج تغيير ( قيمته جديد حوالي 700 ريال)
2- تغيير مجمع الفيوزات الداخلي اللي عند مقبض فتح البونيت لأن يمكن المشكلة في الفيوزات وتوصيلاتها ( قيمته 300 ريال)
3- تغيير مجمع الفيوزات الخارجي اللي تحت البونيت لأن يمكن المشكلة فيه ( قيمته 400 ريال )
4- تغيير كل الاسلاك اللي في السيارة لأن يمكن لاحقنها ماي ومتأثره ومسويه شوط في مكان ما ( تغييرها بحوالي 200 ريال) ويباله وقت
5- شغل يديهم بحوالي ( 250 ريال )
6- هذا الفحص المبدئي واحتمال يظهر شي ثاني يعني مبالغ اضافية

عاد اوين فحص الكمبيوتر ما ظهر لهم شي واضح بالتحديد بالرغم من ان كمبيوتر الوكالة يفترض يكون دقيق ويظهر لك بالضبط وين المشكلة.

قلتله .. كيف تبغاني أغير الفيوزات والوايرات وكل شي في السيارة شغال؟
المصابيح شغالة السيدي شغال الأشاير شغالة الراديو شغال المكيف شغال حتى التحكم بالقيادة شغال.

سكت ما رام يرد ..

يعني يريدني أدفع حوالي 2000 ريال .. ويمكن يمكن تنحل المشكلة

عموما طلعتها من الوكالة ونصحوني الشباب بجراج في صناعية صحار مختص بسيارات الهوندا لأن فيها هندي كان اصلا يشتغل في وكالة الهوندا وطلع عنهم. وديتها عنده وقال لي ان ما عنده كمبيوتر بس وديها جراج آخر وعطاني اسمه وهو اكيد بيحل لك المشكلة.

عاد تخيل السيارة تنتع وتزر عمرها والحالة ما حالة - الله لا يراويكم -

المهم وديتها ذاك الجراج وأول ما خبرته بقصتي وفتح البونيت .. اشار لي على قطعة وقال هاتلي هذي القطعة تبع المكينة اللي شارنها وهذي القطعة هي هذي اللي فالصورة.




قلتله انا بس شريت المكينة بدون هذي القطعة .. قالي روح مرة الوادي الكبير من وين شاري المكينة وهاته

رحت اليوم الثاني من صحار للوادي الكبير لنفس السكراب وقالي ما موجودة .. المهم تبهدلت فيها وحصلت وحدة وشريتها بـ 70 ريال وأنا مغمض وفرحان ولما وصلت صحار قال لي ما هي هذي مال رقم 3 .. ( انتبهوا اصحاب الأكورد لهذي النقطة ) سيارتي رقم واحد والقطعة هذي مرتبطة بالريس مال المكينة .. في سيارات رقم 2 و3 .. تجي القطعة فيها الريس مال المكينة بس أما في رقم 1 ففيها مال الريس يجي دبل .. واحد للمكينة وواحد للكروز لما تريد تثبت السرعة من المقود.

شفتو كيف الحظ النحس؟ ورجعتها غصبن عن عيني ... وعااااااد لف الوادي الكبير يوم تروم تلف .. 4 أيام وأنا الف من الوادي الكبير وبطول خط الباطنة لصحار .. اي سكراب تتوقعوه مريت عليه.

وكلهم يقولولي مالك غير الشارقة ..

طبعا نصحوني بجراج في صناعية الوادي الكبير وشليت السيارة أتعتعها شوي شوي وماشي فايدة ما عرفولها .. مع اني قربت لهم الحل

المشكلة ان الهندي في الجراج أكد علي ان مشكلة السيارة من هذي القطعة ..

ولما شليتها القطعة بالنفس لقطع غيار الهوندا بصحار .. حصلت صاحبنا اللي طلب مني تغيير كل القطع السابقة الذكر .. وشافني اراويها اللي في قطع الغيار اللي استفسر عن قيمتها ( طبعا قيمتها قالي بـ 400 ريال بعد التخفيض توصل 300 ريال ) لما شافني الصاحب قال لي المشكلة ما من هالقطعة .. مستحيل .. لأن هذي بس مال الريس مال السيارة والمكينة.

المهم .. بعدين توكلت على الله ووصفولي الشباب سكراب في الشارقة مختص بس بقطع غيار الهوندا .. اسمه سكراب الطائف .. رحتله وشليت السيارة وغيرت القطعة .. ورااااااااااااااحت المشكلة.

راحت المشكلة والقطعة اشتريتها بـ 90 ريال بسسسسسس

من حوالي 2000 ريال إلى 90 ريال يا ناس.

اللي خلاني متأكد ان هالقطعة هي فعلاً سبب المشكلة هو .. السنسر اللي راكب عليها واللي مدور عليه في الصورة التالية ..




طبعاً مؤشر المكينة داخل الطبلون يظل والع طول الوقت بسبب المشكلة .. ولاحظت اني لما أفصل السنسر .. تروح النتعة من الجير ويبّـدل عادي ما عدا الغيار الأول. بس بشكل ما ملحوظ عشان كذا رحت بها الشارقة

هذي يا ناس مأساتي مع وكالة ما تعرف تستخدم كمبيوتر فحص السيارات ولا تعرف تشخص المشكلة وكان ممكن أخسر حوالي 2000 ريال عالفاضي

وللعلم .. لو قال لي هذا الهندي في الوكالة انه متأكد ان هالقطع لو غيرتهم بتروح المشكلة كنت دفعت المبلغ لأني متعطل وسيارتي عطلانة .. بس الله ستر انه كان يقولي ما متأكد.

ملاحظة: السنسر اللي بالصورة له ميزانية بالكمبيوتر .. عشان كذا له مسامير غير شكل يحتاجلها سبانة خاصة .. عشان كذا ما حد يحاول يبطلها بنفسه .. بس من كان يصدق ان هالقطعة هي سبب كل مشاكل الجير ..

نسيت شي آخر مرتبط بنفس المشكلة .. هالسنسر له علاقة ايضا بالجير من داخل أقصد مقبض الجير في مقصورة السيارة ... تعرفو ايش كان يصير ؟؟ كان لما تحطه في الـ P يقفل وما يرضى يفتح .. وهذي بعد قالي في الوكالة قطعة بلاستيكية متأثررة بالماي وتغييرها يتطلب 100 ريال .. يا ناس يا عالم يا عقال .. قطعة بلاستيكية تتأثر بالماي كيف؟ تصدي ولا تتأكسد ولا كيف بالضبط؟؟

المهم الله ستر ..

وهذي حكايتي عشان لو واحد واجهته مشكلة في الجير يجرب يشوف هالقطعة قبل .. عن يروح ينزل جير او شي ..

طبعا في موديلات 2006 فما فوق هالسنسر مدمج مع السنسر الثاني في الصورة ..

تحياتي لكم اخواني وعذرا للإطالة