[شهوووودة]

اليوم نعم استكاودت أصحى من النوم جلست أحايل عمري عسب اقوم أخبش وجهي ما قادرة ضاربني الكسل والنوم لين النغاغة وتدخلوا مجلس العفاريت والجن والهبايب اللي في راسي عشان اقوم وماشي فايدة .. بعدين تذكرت سالفة التقارير والترقيات هذا الشهر .. نعم فزيت كما اللغة بو مضروبة بمخمة .. قلت الشيمة خليني اروح احسن ..

وتجهزت بسرعه بسرعة والعن الابليس الملعون جلس يوسوس لي راس عشان اكمل نومة الصبح واخسر البونس والترقية .. المهم طلعت بسرعة وفي الطريق لفت نظري لافته كان مال مهرجان مسقط قلت اوووووه تعالوا مهرجان عاد يبدأ اسبوع الجاي وتذكرت موقف صارلنا ايام زمان اول مهرجان في مسقط كان في سنة 1998 ذكريات والله

وقتها كنت أدرس في الاعدادية وأتفقت مع شلة بنات معاي في الصف أن نسير رباعة المهرجان .. ورحت اول مرة في حياتي المهرجان ودخلنا بعد عفسة التذاكر كأن جالسات نطلب فلافل من مقصف هههههه ومعانا وحدة اسمها نعمووه الله يذكرها بالخير عليها طول وملقبينها نعامة الله يهديها وحدة ربشة ومال مشاكل وملسونة بعد ..

رحنا القرية التراثية وكان اول مرة يسويو برنامج اصاله واحنا داخلات عرض وجالسات نتشوف على الحمير وناكل خبز عماني ههههه وفجأة دخل علينا عرض المذيع عبدالله الذهلي

نعم طش فؤادي وسئلنا سؤال ما اذكره زين شئ لونه اخضر في السوق واحمر في البيت ؟؟ واحنا خبر خير في عالم ثاني متصرقعات على الكاميرا اللي تسحب الثانية واللي تسوي هالحركة حال الكاميرا ونعموه جاوبت قالت اشارات مرور هههه قلت : يا خسفة اشارات مرور بالشارع ما فالبيت ..؟؟ وشفنا المصور يغششنا مسكين شافنا بغمان سمعته يقول حناء حناء قلت اووه واسطة وطشت صديقتي قالت حناء هيوااا حناء .. وقال مبروك فزتن بعشرين ريال نعم كل وحدة تشحط الظرف وعاد تقاسمنا فيه العشرين فراخ ومينو وشعر بنات والباقي طبعا خلوها مستورة .. ؟؟ وسألت المصور قلت الشيمة الحركات الربشة اللي مسوينها مسحوها ما تعرضوها فضيحة والله ؟؟ رد علي المصور وهو يضحك : خلاااااص العالم كلها شافتكم انتي ما تعرفي انه كان بث مباشر .. نعم انصدمت وطشن عيوني ويوم وصلت البيت اخواتي يضحكن علي وفي المدرسة وجهنا صار طماط حتى المعلمات يعلقوا علينا وعلى اشارات المرور ههههههههه ...
ايام ما تنتسي ابدا

وفي المهرجان يوم شفت اول مرة هذول بو سيقان الطويلة .. كم مرة بغيت اعقهم او اصكهم بعين عسب يطيحوا ما قدرت ويغموني بعد يرقصوا قدامي كأنه العيد وياخي بغيت اسوي كماهم أوقف فوق قوطي نيدو واندبغ ياخي شطار ما يندبغوا كمانا ...


وكم مرة رحت المهرجان لازم حد يضيع من الصغيرين
وكل مرة نفس الفعاليات ما تتغير الا اخر مهرجان مسقط 2009

كان حلو ومرتب في حديقة قرم طبيعية واستمتعوا الاهل بعرض النافورة بو تروقص والعاب نارية وعروض السيرك وكرنفالات .. طابع جديد ونتمنى يتطور المهرجان بعيدا عن التكرار في الفعاليات نفسها ..

والان نبشركم بموعد أفتتاح مهرجان مسقط 2011

سيبدأ بإذن الله في تاريخ 27 يناير 2011.
الذي سيصادف يوم الخميس بإذن الله تعالى .
واللي حاب يعرف أدق التفاصيل عن المهرجان ما يتردد يدعص
هــنـــــــا

نتمنى لكم قضاء أسعد الأوقات في جميع فقرات
مهرجان مسقط 2011 , تقبلوا خالص شكري وتقديري

سلملم