يابو الشباب لا تحرف كلامي, انا قصدي بنحن انه انا, والناس الي بتجي بعدي تطلع على الموضوع, انا امثل رأي انا وفقط رأي.
عزيزي رجل الاحجية, ألستم انتم
الزرق, بالعكس انتو من كثر ما تكثف الدم
الازرق لديكم, صرتوا "
كحلي". (لـ وين هالجشع عندكم رايح؟)
اريد نقارن بين حالتك انت وحالتي انا وبنشوف هل انت بالفعل ذلك المسكين, الفقير الذي تتدعي انك هو ؟
للحين ما اعرف ليش ما قلت وين عايش, بس كلامي بيكون كله على اساس انك في بريطانيا, اذا انت من بلد ثانيه نقص وزيد حسب العموله والسوق.
اولا قبل ما نبدء عزيزي الكريم, انا صار لي موقف حقير جدا, والموقف عباره عن أني انا ما درست ثانويه عامه في عمان, واخذت شهاده بريطانيه والقبول الموحد رفض يعترف فيها لانها يوم شافوا الشهاده حسبوها من "المريخ" ويوم اقول ما قبلوها يعني ما رضوا يدخلوني نظامهم خير شر (يعني ما اقدر ادخل جامعه والا كليه في عمان) الزبده رجعت شال شهادتي حال بريطانيا وانا مجبر ادرس على حسابي بالكامل او اجلس في بيتي.
على فكره حال الي ما يعرف, المغترب يدفع له في بريطانيا 830 باوند استرليني كراتب شهري, غير التذاكر وتكاليف الجامعه ومن الراتب يتكفل المواصلات والسكن وامور المعيشه.
اول سنه على حسابي, دفعت لسكن صغيرون وكان سعره التقريبي 270 باوند شهري مع الفواتير وكل شيء, وكان مصروفي "الشهري"
150 باوند كبدايه, 270 + 150 = 420 باوند. 420 باوند (فلوسي)
- 830 باوند (فلوسك) = 410 باوند باقي من فلوسك. يعني كل شهر انا اقدر اشتري اي فون, والا لاب توب والا تلفزيون والا اروح لـ لندن او مانشستر لمدة 4 ايام رفاهيه كامله او اشتري لي 10 قمصان Next و بنطلونين G-Star.
مصروفي 50% من مصروفك. (واو انت غني)
الحمدالله, الاوضاع الماليه تحسنت بعدها بـ 5 اشهر تقريبا وزاد المصروف 230 باوند.... (زياده كبيره 80)....
الي لازلت فقط 500 باوند, حوالي 60% من فلوسك فقط... وحياتي في المرحلتين كانت طبيعيه جدا جدا لا جوع ولا تعب ولا شيء واطلع واتمشى مع ربعي ونروح سينمات ونصيع ونضيع وكله طبيعي (واعازم بعدني)... الي انا غامني اكثر شيء انه انت تقول انك هزلان. وانا راجع عمان زايد وزني 6 كيلو كيف كذا!!!
كنت عايش في مدينه اسمها Sheffield لا غاليه ولا رخيصه,
اذا عزيزي الكحلي, فسر لي كيف اقدر انا اعيش شهرين على 830 باوند. وانت تحاتي راتبك من ثاني اسبوع؟
ما اقتنعت ؟ اوكيه انا اعترف, انا قد اكون حاله شاذه.
بس السنه الماضيه تعرفت على مجموعة شباب عماني والنعم فيهم والله رجال , ماخذين بيت كبير في منطقه محترمه وهاديه ويتقاسموا المبلغ, ويا سبحان الله 350 باوند من كل واحد تعرف شو تسوي عندهم؟
تأكلهم اسبوعين, تدفع ايجار البيت, تدفع فواتير البيت, وبترول السياره. << ايوه عندهم سياره
ويبقى عندهم حوالي 480 باوند لكل شخص... واااو
الشخص رقم 1: حاليا في حساب التوفير ماله 5000 باوند لانه كان يجمع الفلوس الي تبقى, وفوقها مدلع نفسه ابو التدليع, شاري بلاي ستيشن 3, تلفزيون, وي, تلفونات, ماك بوك, 24 ساعه يتشرى من ebay, اي شيء يخص الالكترونيات هالادمي عنده...
الشخص رقم 2: يطرش فلوس لأهله من هنا حال عمان.
الشخص رقم 3: هذا مسكين, كل يوم بمصيبه ويسوي عمليات بأسعار تكسر الظهر (فلوسه تروح للمستشفى دوم).
كلهم, مشتركين في صالات رياضه, وفي الاسبوع مرتين سينما وبولينج, يومين على الاقل اكل من برى, اكلهم العادي عباره عن عيوش ودجاج ولحم, وعايشين ملوك. واخر مره رايحين تونس في الايستير ناس عايشه حياتها... حتى تذكرة الرجوع لـ عمان, يوفروا فيها فلوس ويجيبوها أرخص ودوم يرجعوا في الكرسمس.
و2 منهم اخذوا بعثه ماجستير.... وراتبهم زاد اكثر ههههه
تقول ولاد
زرق مال خاطر وهم كل واحد على قد حاله.
لا يكون انتو عايشين كوكب أخر؟ لانه شخصيا بديت اشكك من يوم موضوع شهادتي يوم حسبوها من المريخ!
اعزائي الكحلين:
- اذا مشتاق حال اهلك وحال امك, ولا تروم بدونهم, ارجع بلادك, ما اعرف ليش تتمسكنوا و دووووم مخلين نفسكم مساكين, اوين هيبنوا عمان وهم ما رايمين يصبروا 4 سنين عن ابوهم وامهم!
- اعزائي الكحلين ليش ما تفتحوا عيونكم وتشوفوا غيركم؟ هل أنتم أحق من المساكين الي جاين على بعثات جزئيه؟ والناس الي اسوء منهم (انا
), اذا شيء فلوس زايده تحول البعثات الجزئيه الى كامله أبرك.
- اعزائي الكحلين, تراه ما يضر تتعلموا تطبخوا على الاقل بيض, اعرف فلوسكم تروح على اكل المطاعم.
-اعزائي الكحلين, الاستكشاف جيد, لا يعني اتباعك لطريقه محدده تعني انها الوحيده او الافضل, جرب اشتري اغراض من اماكن ثانيه, جرب تاكل في اماكن ثانيه, كل ما تنوعت كل ما حصلت بدائل افضل وارخص. انحرف قليلا عن روتينك اليومي.
- اعزائي الكحلين, امشى, التكاسي حال الكاش.
- اعزائي الكحلين, ذي البلاد كلها سعودين, مستحيل ما تلقى عربي تصادقه, سوي علاقات لا تحسب عمرك شيء, تراهم بيفيدوك بقوه.
- اعزائي الكحلين, انا طلعت الاول على دفعتي, يا ترى الفلوس أثرت علي سلبيا؟
-اعزائي الكحلين, ما تستحوا على وجهكم؟ خلو الدلع الزايد, تراكم ما جهال, فلوس ما عارفين تحافظوا عليهن! سبحانك يا رب موضوع بالفعل يغم ويقهر.
اخوكم الاصفر (يعني يابس ما عنده شيء) العيسائي