لهواة الصيد : صور لـــ الجتي ( مارينا ) الرصيف البحري في ( يتي ) مرسى السفن المهجور ....
 

صور لـــ الجتي ( مارينا ) الرصيف البحري في ( يتي ) مرسى السفن المهجور ....

السلام عليكم ورحمة الله وبركاته ..

نظراً لعدم معرفة الكثير من محبي هواية الصيد لهذا المكان ( وبصراحة انا من مسقط وماكنت أعرف هالمكان ) قررت أن أروح هناك وأعيش لحظات رائعة فيه وأفيدكم ببعض الصور ..
المكان رائع جداً وبه رصيف خرساني دائري كبير جداً ورصيف حجارة أكبر بكثير من الرصيف الأسمنتي ، يعني تقدر تجلس فأي مكان ولاتخاف أنك مابتحصل مكان تجلس فيه ، والأحلى عاد أن السيارة طبعاً توصل لحد الرصيف الأسمنتي ( ويجب الحذر من السقوط في البحر لان الأرض مستوية تمام مع الرصيف ) ..

كيفية الوصول إلى الجتي ( مارينا ) الرصيف البحري في ( يتي ) :


تسلك نفس الطريق المتجه إلى قنتب الجصة من تنزل الصعدة لاتلف بإتجاه الجصة تروح عطول كأنك رايح منتجع الشنغريلا بيجيك دوار الشنغريلا اسلك الدوار سيده تمشي مسافة بسيطة بيجك دوار ثاني اسلك يسار الدوار بإتجاه الطريق الترابي بإتجاه الشرق تمشي مسافة شوي طويلة طريق ترابي لكنه تقريبا سلس وبإذن لم تشوف الرصيف البحري معناه أنك وصلت ..


المسافىة من وادي الكبير إلى الجتي ؟

تقريبا 7 كيلو ما متأكد لاتي ماحسبت

والآن أترككم مع الصور ( وأعتذر لعدم وضوح بعض الصور وذلك لانني قمت بالتصوير قبل المغرب بقليل ) :



http://up.arab-x.com/Sep10/JMM61623.jpg


http://up.arab-x.com/Sep10/Ls961623.jpg


http://up.arab-x.com/Sep10/Ihn61623.jpg


http://up.arab-x.com/Sep10/ZdB61623.jpg


http://up.arab-x.com/Sep10/iMX61623.jpg


http://up.arab-x.com/Sep10/PNr61917.jpg


http://up.arab-x.com/Sep10/iPI61917.jpg




تحياتي لجميع من
مر على موضوعي واتمنى إبداء ملاحظاتكم حول هذا المكان الرائع ..

بصراحه اشجع الكل يزوره حماااااااااااااااااااااس انا رحت كم مره

مكان شي لكن شي سمك ولا جلو وشلته

ما شاء الله مكان كثييير رائع...
خبرني عنه اخوي بوخالد الفهدي جزاه الله خير بس ما صار وزرته....
وان شاء الله بزوره...


كيف الصيد فيه؟!!

هذا المارينا تابع لمشروع محمد بن راشد اللي توقف وهوه في حلة حنشفت بعد يتي

واصلا ماشي صيد هناك بس ينفع عشان تتسلى بوقتك هناك وتلقى أغلب بو يصيدو هناك هنود وبنجاليه

اللي يريد يصيد يجي المارينا مال السيفة اللي بعد يتي هناك الصيد صح

وبعدين الماي اللي يدخل للمارينا اللي في حنشفت يجي من الخور ما من البحر
أيش يصيدوا منه !!

مكان رائع
بس ماشي اهتمام :مرتاح:
كل الاهتمام في المشاريع التي تدفع لها بالملايين ع الفاضي :مرتاح:

ماشي اهتمام لأنه مو ملك الحكومة ..هذا المكان خاص
بعد خسارة محمد بن راشد أثناء الأزمة المالية الأخيرة وانسحاب شركة عمران العقارية كانت عليه ديون لحكومة أبو ظبي
وما قدر يكمل المشروع ..فاشترى المشروع صاحب الجلالة وحاكم قطر وحسب ما سمعت انه فيه مستثمر راح يشتري المشروع ويكمل عمرانه
كذا ولا كذا هيه لعبة سياسية والشاطر يفهمها

مالنا حاجه بذا كله صديقي...:عيار: المهم الصيد

الصور جميله......والمكان أجمل
اشكركـ

شي جميل

مكان جميل نشكرك عليه أخي العزيز
بس من الصور لاحظت ما يصلح للعوائل اللي عندهم أطفال عن يطيحوا في البحر أو شي مكان آمن فيه؟!
تحياتي

العفو عزيزي ..

كلامك صحيح ماينفع للعائلات المكان خطير لانه عميق كثير ولايوجد فيه حاجز ..

لا عزيزي الماي الي يدخل المارينا يدخل من البحر ..

ولو تشزف الصور أعتقد انها توضح ذلك ..

عاد ما أدري إذا تقصد مكان غير عن هذا ..

أنا لما رحت كان مافيه صيد كثير ..

ولما سألت قالوا ان هالوقت أصلا مافيه سمك كثير فكل مكان تقريبا ..

وقالوا الشباب الي هناك وكان عددهم كبير أن السمك هنا كثير بس يعتمد على حسب الوقت الي تصيد فيه .. يعني لما يكون البحر مرتفع وأكثر وقت لتواجد السمك فيه بالليل من الساعة 1 لحد ساعات الصباح الأولى ..

والله لما كنت هناك ما كان فيه صيد كثير لان كنت موجود هناك الظهر

بس الشباب يقولوا أنه أفضل وقت من الساعة 1 بالليل لحد ساعات الفجر الأولى .. والله أعلم

ممكن توصف المكان اخي العزيز , واذا بالصور يكون افضل

لحظات برجعلك

تسلم الغالي علي هذا التقرير الجميل
بس لو صغرت الصور كان ميتين ميتين
تسلم بارك الله فيك
رائعة من راوئع عمان ترتسم في سبلة عمان

شكرا أخي الكريم على مرورك الكريم ..

بالنسبة للصور ماكان عندي وقت عشان التصغير ..

بس إذا حصلت فرصة راح أصغرهم إن شاء الله ..

اعتقد هذا هو الموقع ... اذا كان نفس الموقع اعتقد بأنه مكان مناسب للصيد خاصة اطلالتة على البحر مباشرة

خاصة في هذه النقاط

هذه شكله يبغاله فورويل , وانا عندي اول ويل

لا يا اخي الشارع مستوي انا رحت الموقع قبل اكثر من سنه كان العمال يشتغلون ف الشارع اعتقد الحين شارع جاهز لما رحت كان الشارع ترابي بس تقدر تمشي بالصالون

لو تلاحظ في هذه الصورة الجوية القديمة طبعا ان الشارع قار حتى بعد الدوار الثاني والباقي كان يشتغلوا فيه الحين يمكن جاهز

مشكور أخي عالتوضيح الرائع بالصور والجهد المتعوب عليه ..
وبالضبط هذا هو المكان ... وهو مطل عالبحر مباشرة ..

تحياتي لك ..

لاعزيزي الناس تروح كلهها بالصالون ... الطريق مو وعر كثير يعني أغلبه مستوي وزين
وهو لحد الحين مو مرصوف الإ جزء بسيط منه ..

تحياتي الخالصة ..

مشكورين يا أخوة على التوضيح والمكان يستاهل الزيارة

ياليت وصف دقيق وصور للمكان