مساعدة بخصوص الاطارات
 

السلام عليكم

سيارتي كانت فيها نفضة كبيرة بسبب التواير الخلفية إنهن قديمات خاصة عند السرعة 80-100
فرحت وبدلتهن وسويت لكل التواير ميزانية بس بعدها النفضة شوية باقية على نفس السرعة!!:مستغرب:
مع العلم الحين التواير الاماميات برجستون بوتينزا(مبدلنهن قبل 6 أشهر)
والتواير الخلفيات برجستون تورينزا

هل يؤثر؟؟:مستغرب:
أرجو المساعدة للي يعرف المشكلة؟؟:حزين:

ياخي بصراحه البردجستون اشوفهن ما لين ذيك الدرجة ... احسلك لو مشتري ميشلان ... والله روعة ويصمدن فترة اطول ولما يبنشر الاطار ما ينفجر ... بنشر علي ايطار ميشلان بسرعة 140 ... وانا ما حاس سوا انه السكان شوي يحذف حاجه بسيطة ... وتوقفت وعاد شفت ااطار مبنشر ثاقبنه مسمار !! اما بردجستون ما اظن مثل جودة ميشلان !!
بالنسبة للرجفة يمكن ترجع للزخرفة او تشكيلة خطوط الاطارات ... بس عادة اذا عندك سيارة فخمة او شوي ثقيله بالطريق اختلاف نقشة الاطار ما بتحسها ابدا !!

مشكور على الإفادة:)
الصراحة التواير اللي قبل عندي برجستون وجلسن عندي لأكثر من سنتين ونصف وباينات زينات بس الحين ظهرت عندي هالمشكلة اللي خبرتكم ياها , وسيارتي لجاسي2001 ثقيلة تعتبر:مستغرب:
بعدني مستغرب من هالحالة؟؟؟!!!:معصب:

ما مفروض يكون التواير كلهن من نفس النوع ؟(الامامي والخلفي ) ؟

وأنا هذا سؤالي!
هل يعني لازم لازم نفس النوع؟؟وهل دائما يؤثر؟؟:مستغرب:

اعتقد لما يكونو مختلفات من كذا يكون عندك رجفة او مشكلة .. فكل نوع في تصميم غير .. فالتواير الامامية غير والخلفية غير يعني ما في موازنة بين الامام والخلف من ناحية توزيع الوزن و ادراج القوة الى العجلات ..

عجب قبل كان الخلفيات وحدة برجستون قديمة والثانية مشيلان وما شي نفضة البر في فترة ال6 اشهر-يعني أبو الاختلاف!!:مفتر:
سبحان الله

الرنجات زينات وكما خبرتكم الاطارات كلهن مسولهن ميزانية وفي وكيل البرجستون :مستغرب:
وبعدها المشكلة:معصب:

انا كنت استخدم اطارات بوتينزا ( بريجستون ) و مايكملن سنه ! ابدلهن عالضمان صارت معي ثلاث مرات تقريبا ..
لانهن ينشرخن من الجنب ... والاطارات كان قياسهن 45 ( السمك )
و في مره احد الاطارات قطعه كبيره منه انشالت كأنه حد مقشّر التاير !!
بس غيرت للفايرستون واستمر معي فترة اكثر من سنتين واكثر من 100 الف كيلو بكثير !
الفايرستون توهن تعبن قبل اسبوع بعد ما صمدن لمدة فوق السنتين وخطوط بالطول وبالعرض بشوارع عمان والامارات .. كنت احس بالنفضه لين ما ورم تاير خلفي وصار مثل البالونه !!
بس في نوعيه حلوه للبريجستون اسمه تورينز الملقب بالاطار الصامت .. مجدي و مريح اما البوتينزا اغسل ايدك منه.
بالنسبة للنفضه .. حاول انك تعل ميزانية مره وتأكد في نفس الوقت من العامل اذا كانت الميزانيه صحيحه ولا لا ...والرنج صاحي ولا لا .. لانه لو تضرر الرنج بتروح الميزانيه .. وفي احتمال ميزانية الرودات -شوف اذا السياره تروح يمين يسار ..
شكرا

اخوي:بلابلا: تعال شوف هذا الموضوع:) يمكن غاوي ويفيدك لمشكلتك :)

http://www.s-oman.net/avb/showthread.php?t=189133

انا بعد نفس سالفتك ... عندي كان بوتنزا بردجستون ... مره ماشي عادي وشفت الاطار وحده من غير شي تنصخ ... ولما نزلت شفته منشرخ من الجنب مادري ليش !!! :مفتر::مفتر: وبعده ما مكمل سنة والسيارة جديدة والاطار جديد !!! قالولي بعض الشباب انه بوليش الداش بورد ما مفروض يرشبه الاطار ييبسه ... يعني يقصدوا البوليش الاصفر !! وحاليا استخدم بوليش رغوة افضل واحسن للأيطار !! :)

السلام عليكم
1. أخوي لا تحاول تخلط أكثر من نوع من الإطارات حتى لو كانت من نفس الماركه لإنه بإختلاف النوع يؤدي إلى إختلال الثبات وخاصةً على السرعات العاليه حيث يختلف كل نوع عن الثاني من ناحية الثبات ودرجة التحمل.

2. حاول تغير أماكن الإطارات كل 15000 كيلو متر حتى تضمن أطول عمر ممكن للإطارات.

3. بالنسبه لنوع الإطار أعتقد من الأحسن لو تشوف TOYO PROXES أو BRIDGESTONE TURANZA GR-80 أو GOODYEAR EXCELLENCE لإن سعرهن معقول و أدائهن ممتاز جدا وأنا الصراحه ركبت التويو بروكسيس وحسيت أدائه أحسن من الميشلان إنرجي إلي كان في السياره (مجرد رأي):متفكر:

أعذرني أخي عن الإطاله:مستحي:

شكرا لكل الأخوة اللي أفاد بشي وما قصرتوا..
وإن شاء الله تنحل المشكلة

بالتوفيق للجميع ولكم المودة