اريد اشري النترا وش رايكم؟؟؟؟اصحاب الخبرة الرجاء الدخول!!!
 

اخوي السنة الماضية مشتري هايونداي النترا
شكلها زينة ولو اني افضل السيارات الراضية وما اعتقد انه قيمتها وايد تو انا وش خصني ف السيارات خلي الشباب يخبروك

احنا عندنا هايونداي النترا مافبها شي حلاتها عندنا من سنه وللحين ماجالها تعبتنا فحاجه مشاوير البيت كلها عليها حليلها تكد

اذا الواحد يحب المشاوير خارج المدينه بصراحه مب حلوة كلش
اذا استخدامك فقط في المدينه والدوام يعني يمكن تمشيك فترة

صحيح هي لتمشيه مشاوير داخل المدينه

اذا تريد تشتري سيارة من الوكالة نصيحة مني لا تشتري كوري ابد اشتري سيارة يابنية بدل ما تخسر فلوسك

اخي العزيز انا شخصيا اشتريت اسبوع الماضي سيارة ( النترا ) بالصراحة سيارة جميلة وثابته في الشارع فقبل ان اشتري تلك السيارة استشرت كل واحد من زملائي في العمل عن عيوبها ومميزاتها فكلهم اللي عنده مثل تلك السيارة شجعوني ان اشتريها وفعلا اشتريتها والحمد لله على ذلك . فعلا توجد نوعين كما تفضلت 1600 سي سي و2000 سي سي .

ممكن تخبروني بأسعار 1600 سي سي في الوكالة
وايضا سعر 2000 سي سي في الوكالة
مع الشكر لأصحاب الخبرة

ترتيب صراحة !!

عندي النترا 1600 سيسي....قويه ما شا الله عليها...لحد الحين اربع سنوات لا مشاكل ولا تقرطيعه...المكيف من انتراكتيكا الصرفي زينه نسبيا و اذا معك 2000 سي سي تراها ريح......تبيض الويه فالخطوط يوم تلقى شاحنه قدامك تمشي ستين ما تتكاسل....واسعه نسبيا بالنسبه لسيارات اللي بهالقيمه...ما نكرت عليها شي مكلف صراحه..بس غيرتها و خذت تويوتا و السياره راحت لاخوي و تصن بعدها رغم الكرف.

إحنا عندنا النترا 2007 سعة 1.6 ليتر والسيارة حلوة وواعة نسبيا وثباتها لاباس فيه
سعر ال1.6 لتر 4952 وسعر ال2.0 لتر 5227

هذي الاسعار تشمل:
- التأمين شامل وكوارث عمان
- التسجيل
- سرفس مجاني 35 الف كيلو متر أو سنتين أيهما ياتي اولا

ضمان السيارة 3 سنوات أو 60 ألف كيلو متر بو يسبق بس إذا دفعت لهم 50 ريال زيادة بيخلو الضمان 3 سنوات ثابت

الاسعار إلي ذكرتهن لك اسعار اولية يعني تقدر تنزل السعر

بالتوفيق لك وإن شاء الله تتوفق في إختيارك

عن رأي الخاص والمتواضع اخي العزيز من خلال تجربة احد من الاهل انصحك لا تشتري هايونداي او كيا بهما عيوب كثيرة فأنته عقلك في رأسك وتعرف خلاصك اقول لك فكر تفكير عميق وستشير اكثر ما خاب من استشار

الصراحه انا عندي ألنترا موديل 2003 والحمدلله عندي صايره حمارة مكده
وأحلى ما فيها انها 2000 سي سي
وطبعا ما يجيك ما تضرب ريسات
وفي الخطوط تعزك

ألنترا سيارة تمام التمام....بس الوكالة التابعة لها(أعوذ بالله من الشيطان الرجيم) خلي السرفس حالهم وشيل السيارة...؟؟

صدقت والله

سياره تمام بس حافظ عليها تراها كوريه وبالمحافظه تدوووم


ولا يكلف الله الا وسعها

ومد ريولك ع قد لحافك

بصراحة النترا حلوة , انا عندي النترا 2008 والحمدلله ما اشتكي منها بس اهم شي تحافظ عليها وما بتندم اذا اشتريتها ان شاء الله

اوكي انا عندي النتراء بس وين تفظلو احسن سيرفس وكاله ولا خارج الوكاله

انا سئلني عن 8 سلندر قوم شلة المستانج وربعه ( حممممماس ) http://www.lakii.com/vb/smile/2_110.gif

لحبيب سيارات الكورية بشكل عام ماتصلح حق المشاوير البعيده ، وخاصة في فصل الصيف
عليك بالياباني

عذرا اخي العزيز انا جربت الكوري فقد اشتريت سيارة دايو وكديتها 5 سنوات والحمد لله وكنت امسك بها خط الامارات سواء في الصيف او في الشتاء وبدون ان يصيبها اي خلل
الاسبوع الماضي اشتريت النترا 1600 بالصراحة سيارة حبوبه وثابته في الشارع
بالصراحة الهايونداي اثبتت وجودها سواء في سلطنة عمان او غيرها

بصراحه

إ

الانتراء سيارة حليوه وثابته
نحن عندنا النتراء 2008 بصراحة رهيبة 1600 سي سي رقم واحد فول ابشن ما عدا الرنجات والكشافات
فيها نظام EPS نظام الثبات الالكتروني ما موجود ولا فسيارة في فئتها حتى حال خطوط زينة صرفية بترول ماشي قوية فيها نظام فالمقود اذا كانت السيارة واقفه يكون خفيف مثل الريشة وكل ما تسرع يثقل
المصابيح ترفع وتنزل اتوماتيك والمسجل فضيع سي دي وكاسيت وواسعة وحبوبة من داخل
قيمتها 4750 الف ريال عماني رقم1 فول ابشن ما عدا الرنجات والكشافات
بصراحة افضل تاخذ 1600 سي سي لانه المكينة تجي تشيين يعني سلسلة حديد
اما ال2000 سي سي تجي (تايمن بيلت)

عزيزي طارح الموضوع
الإلنترا سيارة كشخة و أقتصادية و قويه و زينه مال مكدة
أنا عندي وحدة و رحت عليها السعودية و أروح عليها قطر و ما مخلي مكان في عمان ما رحته
والحمد لله ما عبت عليها أي شي والله
تعجبك في الثبات في الشارع و البترول
ما عليك من كلام اللي يقول ما تصلح لخطوط
يقول المثل أسأل مجرب و لا تسأل طبيب

و أزيدك من الشعر بيت
للي يقول ما تصلح في المشاوير و خصوصا في الصيف
أقوله أنا رحت عليها السعودية من عمان إلى مكة والسيارة ما أوقفت تشغيلها و بعد في عز الصيف
والحمد لله رب العالمين ما ذلتني أبدا
والبترول ما تصرف
أهم شي أخي صيانة السيارة المنتظم

و أزيدك من الشعر بيت
للي يقول ما تصلح في المشاوير و خصوصا في الصيف
أقوله أنا رحت عليها السعودية من عمان إلى مكة والسيارة ما أوقفت تشغيلها و بعد في عز الصيف
والحمد لله رب العالمين ما ذلتني أبدا
والبترول ما تصرف
أهم شي أخي صيانة السيارة المنتظم

أنا عندي إلنترا 2004 وقطعت 250000 كيلو وهي 1600 سيسي بس لا عقبت بها لا ارض ولا سما كرف 24 ساعة وكله خطوط الشرقيه وصلالة ودبي بس بأمانه صحيح انها شبيه الريح اثبت من تويوتا كورلا مرتين فالشارع لان معنا في البيت كورولا 2003
اهم شي لا تقصر في نوعية الاطارات والصيانة الدورية واهم شي تغيير:

1- (التايمنج بلت) + السيور الثلاثة كل 60000 للموديلات من 2005 وتحت لان موديل 2006-2007 تجي سنجل حديد
2- فلتر البترول ويقع تحت الكرسي الخلفي للسيارة قيمته 8 ريال وتبديله مال 3 ريال (خارج الوكالة) طبعا ايضا بدله كل 60000 او لو حسيت ان السيارة بدت تقطع في المشي والسبب المصفي هناك يكون توسخ من محطات البترول القديمة
3- حاول تشيك على الأكسلات وربلاتها دوريا لان هذه الاشياء طبيعي لازم تتبدل في اي سيارة لانها مستهلكة.
4- إذا ما ترغب تسرفس في الوكالة احسن لك بس اهم شي قطع الغيار تكون أصلية واذا عندك تدفع سيرفس معهم وصادق لك واحد في الوكالة بيرتب لك امور السيرفس.
5-الآيل غيره كل 5000 وغير الفلتر بتاع الآيل أيضا مع كل 5000 لان الوكالة تغيره مع 10000 ولكن الاحسن تغيره مع 5000.
صرفية البترول لا شي بس تراها اكثر بشوية عن الكورولا

(ملاحظة هذه الملاحظات في حالة ان السيارة تكون مستعملة)

خارج الوكالة طبعاً.....ألف مكان يعملو لك سيرفس وأمام عينك وبأقل الأسعار بشرط تكون قطع غيار أصلية....