المساعد الشخصي الرقمي

عرض الإصدار الكامل : على الجنور


نديم بهلاء
23/10/2010, 11:44 PM
على الجنور

على الجنور كنا صغار*
ونتسامر مع الأشجار
ولا تستغني عن
همساتنا المدره*
وبعد الظهر
شمس وصيف
وغربي حار
تهدي من لهيب القيظ
هذي السدره
وتشغلنا عن التفكير
إذا نادى على أغصانها
الصروخ في خدره*
توبد يا أبو سالم*
يوم أهمس على أذنك
بنبطي هذه المره*
تبي تذكر تعال أذكرك
خليك عدالي*
أنا عندي سوالف لك
فيها الفائدة العوده*
ولا فيها لك مضره
تناوشنا أنا وأنت
بعد ما قلت لي عيار
وتزاعلنا ثلاث أيام
ولا حسيت بالراحة
مع زعلك
ولا حسيت بمسره
وعلى بالي أحاديث النبي
وهو يوصي بحب الجار
أحترم جارك ولا تضره
وأنت كنت لي صاحب
ونعم الجار
ولا أفرط يا بوسالم
فيك وعشرتك والله
ومره بعت لك سيكل
خفيف وبريكه عالشعره
سريع يسابق الشطار
لي في السوق موصوفين
ولمطارد لهم خبره
أقول الشعر لك تذكار
هواجس قد طرت ع البال
وبعضه شي من حسره
على أيام عشناها
نفت عن نفسها التكرار
ونفتنا للزمان اللي
سقانا الشربة المره
ولا شفعة طفولتنا
لنا من نقمة الأقدار
جافانا الزمان اللي
هجر خيره وطغى شره
إذا جانا الفرح مره
قطعنا في الحزن مشوار
وإذا نمنا بهنا ليله
تليناها بعشر كدره
أنا بقلب الذكرى
لبوسالم الأخ الهودار*
عسى يطيب قلبه من
عناء لهموم ويسره
عساه ينال أفراح
مثل غيث السماء المدرار
ولكل من سار في درب
الصداقة زهرة عطره.
________________________* الجنور/ اسم يطلق على الساحة.
*المدره/ مكان استخراج المدر اللازم لصناعة الفخار.
*الصروخ/حشره طائره تطلق صوت كالصفير. *توبد/ تتذكر.
* بنبطي / سنتأخر.
* العودة / الكبيرة.
*عدالي/ إلى جانبي.
*الهودار/ الطيب الشهم.

م
ح
م
و
د