علمونى المندازي الاصلي....

[malaksh]

مراحب...

بما اننا على ابواب الشهر الفضيل ابغى اتعلم المندازي الاصلي ..الي يكوون مرة منفوخ من برى ومن داخل كانه اسفنج مش فاضي يعنى يكون اصلي اصلي مثل مال المطاعم الزنجبارية ...


وكل عام والجميع بخير

[عاشقة الشروق]

اللي تحصليه ف الكتب ما مضبوط ما يطلع اصلي ابدا
والمندازي ما يعتمد ع المقادير

[الهبه]

انا ما اعرف اسوي مندازى

[سيرة الحب]

وانا اريد اعرف كيف يعملو مندازي الفرن واااجد روعة
سألت كذا وحدة ما عرفن...وعاد الشغالة يوم عجنت حال المندازي العادي خذيت جزء من العجينة وحطيتها بالمكرويف وعاد جات الشغالة تصرخ حريق حريق

دخلنا المطبخ ولا اشوف مندازيتي احترقت بالفرن وصارت مندازي فحم مش مندازي بالفرن خخخخخخخخخ"مشكلة لما وحدة تتذاكى"

اما مندازي الاصلي فعلمي علمش بصراحة الشغالة وماما يسوينه وطريقته خبصو وصعبة مافيني بارض اتعلمها

[آيات 0]

المندازي بالذات لا يمكننا الاعتماد على المقادير فقط حتى يضبط

مدة العجن شكل العجينه وسماكتها وحتى في القلي له خصوصيه

من فتره طلبت اتعلم المندازي في منتدى آخر
وكسلوني البنات وعجزوني ..
وثاني يوم لقيت صحن مندازي واصلني للبيت من صباح الله خير
على طول صورته مع كوب شاي ونزلته المنتدى اغاير البنات واشكر الاخت اللي جابته لي
ممممممم شو أقول وشو أمدح تسلم يد اللي سوته فعلا مندازي ود أصل
بس حاولت وما يأست ولكن ما طلع بالضبط مثله
وما زالت المحاولات جاريه

[malaksh]

دوكم الحاله ....ليش العجازة ما عليه انا بالي طويل (وحده عندها شغاله ) خخخخخخ قصدي شغالتى


وابغى اعلمها اياه يالله ابغى المقادير برايه اتعلم اخبص المهم يطلع مندازي

[Um Ghaith]

أرسل أصلا بواسطة malaksh

مراحب...

بما اننا على ابواب الشهر الفضيل ابغى اتعلم المندازي الاصلي ..الي يكوون مرة منفوخ من برى ومن داخل كانه اسفنج مش فاضي يعنى يكون اصلي اصلي مثل مال المطاعم الزنجبارية ...


وكل عام والجميع بخير

هلا الحبة أنا عندي المقادير بس ترا تكيلي حسب خبرتك في الطبخ. المقادير هي
طحين-زيت-بيض-سكر-خميرة فورية (حبيبات)-هيل-ماء للعجن

الطريقة:
1. تخلطي المقادير الجافة أولا (الطحين-السكر-الخميرة-الهيل)
2.إعملي حفرة في الخليط
3.ضيفي باقي المقادير (بيض-زيت-الماء حسب الحاجة)، أهم شي تكون العجينة طرية بعد العجن
4.خلي العجينة ترتاح مدة ساعة ع الأقل
5.إفردي العجينة بسمك 1سم أو أقل بشوية و قطعيها حسب الرغبة
6.سخني زيت القلي و إبداي في القلي بس أهم شي تنتبهي لحرارة الزيت ما تكون عالية كثير ولا منخفضة يعني وسط. إنتبهي للمندازي إذا ما ينتفخ معناه إنك فردتيه خفيف
ومع المحاولة المتكررة راح تضبط معاك إنشاء الله

[ألماسة السبله ( اليمامه)]

وانا بعد ما ضبط مني يطلع مفرغ من الداخل

[غبار الأمس]

اخواتي المندازي يباله طوله بال

المهم لازم العجينة تكون سمكية شوي ما تكون رفيعة لانها لو صارت رفيعة فطبيعي راح يكون فاضي داخل مثل الكيس
المهم العجينة تحتاج لخميرة بمقادير متوسطة

انا راح اجيب الوصفة بكره وراح تعرفون الطريقة ان شاءالله

يامي يامي على المندازي

[ألماسة السبله ( اليمامه)]

نتاليا اذا العجينة سميكة ماراح تنضج من الداخل انا جربتها
وايضا ما تكون ضعيفة كثير
وطبقت طريقة المندازي لأم آية في كتاب أطياب
صحيح طلع حلو بس ما منتفخه

[ام الاميرات]

كنت مارة من مكتبة في مركز الوادي وشفت كتب طبخ جديدة وجلست اتصفحهم وشفت طريقة عمل المندازي العادي وبالفرن ... بس ما ادري اذا الطريقة مضمونة بس اكيد بشتريه لرمضان

[الفقيره الى الله]

أنا عندي المقادير اثنين بالزيت بالفرن
مندازي بالفرن

المقادير:
3 اكواب دقيق
2 م ط خميره
2 صفار بيض
1 فنجان قهوه عربيه زيت
1 فنجان قهوه عربيه زبده بدرجة حرارة الغرفه
ا كوب حليب دافي
2/1 كوب حليب بودره
قليل من الهيل
1 م ص بيكنج باودر.
2/1 كوب سكر


الطريقه:
يخلط قليل من السكر+الخميره+فنجان قهوه ماء دافي ويترك 5 دقائق.

تخلط بقية المقادير في العجانه ماعدا ال بيكنج باودر لمدة 8 دقائق يضاف بعدها ال بيكنج باودر ويخلط لمدة 5 دقائق .
يترك العجين الى ان يتضاعف حجمه.
تمسح اليد بقليل من الزيت ونجمع العجين
ونقسمه الي 5 او 6 اقسام.
نفرد العجين على شكل دائره وتقسم كل دائره لاربعة مثلثات.
ندهن صينية الفرن بقليل من الزيت ونحط المثلثاث بحيث نترك مسافه.
تترك العجينه لتتخمر مره ثانيه ثم تخبز في الفرن وبالعافيه.



مندازي بالزيت:
في وايد طرق حق طبخ المندازي وبحط الطرق الي حصلتهم وعاد سو الي يعجبكم يا حلوين

الطريقة (1)

المقادير

-خمس اكواب طحين ابيض (رقم واحد)
-بيضتين
-اربع ملاعق حليب
-ملعقتين خميره
-ملعقه بيكنج بودر
-نص كوب زيت
-كوب سكر او ممكن تسوي زياده اذا كنت تريده حلو وايد
-ماء للعجن
-رشة الهيل
-2 م ك روب(اختياري)
-2م ك كسترد(اختياري)
الطريقه

-تخلط كل المقادير اللي عندك وتعجنها مع بعض جيدا (عجينة كل ما عجنتها اكثر كل ماكانت طريه واحلى) وتتركها بعد كذا وتغطيها لحد ما تتخمر وتنتفخ.
-تاخذ شوي من العجينه وتكورها وبعدين تبداء تفردها وبعد كذا تقصها على شكل مثلثات او دوائر
-بعد الفرد تتركها ربع ساعه وبعدين تقليها في زيت (ولازم يكون الزيت كثير عشان الخبز ينتفخ من كل الجوانب)
-وطبعا لما تحمر (لونها يكون ذهبي او بني فاتح) تشيلها من الزيت وتحطها على ورق عشان يمتص الزيت منها........وتستمر على هذه الطريقه لحد ماتخلص الكميه اللي عندك

[amool]

والله بلا وجع رأس وطبخ ونفخ ما عليك الا بمطعم عالم الفضاء فيه دقيقة ويكون جاهز لا تقولوا عجز بس مثل ما أنتوا ملاحظين الدنيا حر والمطبخ ما ينطاق فهالحالة

[دونت كير]

معقولة ماتعرفن تسون مندازي؟؟



هو اكثر شي يعتمد على خبرة العجن واللفرد..ووضعه على الزيت..
واحيانا تضيفن له نكهات ..على حسب الذوق..

بالتوفيق

[فرح]

الاخت ام هيلانا منزلة موضوع طريقة عمل المندازى سوى بحث وان اء الله يعجبك

[قصيدة]

انا اسوي طحين وزيت (ناس يسو الزبدة) و حليب بودر و خميرة و ماي و هيل و شوي بكينج بودر (هذا السر) و سكر و اخلطهم و اترك العجينة ترتاح و بعدين اقطعها و اقليها يبدوب الريحة توصل بيت الجيران

جارتنا زنجباري تتركها فوق ليسو و تغطيها بليسوا ثاني ترتاح و تنتفخ و يوم تقليها الريحة تعج الحارة اظن السر في لواسي الزنجبارية خخخخخخ

[سايره ف دربي]

عيل أنا دايماً أسوي ويضبط معي

وأول مرة سويته وضبط

ليش تعقدن البنات

[بنت النوخذة]

حسب معلوماتي ان المندازي سر نجاحه في كثرة العجن

وعموما كل المعجنات كلما عجنتي اكثر طلعت احلى واطيب

انا مشكلتي الكبيرة وما اظن بتنحل الين اموت هي اللقيمات