سبلة عمان

العودة   سبلة عمان » السبلة الثقافية » أرشيف السبلة الثقافية » سبلة الثقافة والفكر » سبلة الثقافة الرقمية

ملاحظات \ آخر الأخبار

 
 
أدوات الموضوع البحث في الموضوع أنماط العرض
  #1  
قديم 02/09/2010, 08:56 AM
عبدالعزيز علي البلوشي عبدالعزيز علي البلوشي غير متصل حالياً
عضو نشيط
 
تاريخ الانضمام: 16/09/2008
الإقامة: سلطنة عمان
الجنس: ذكر
المشاركات: 607
افتراضي أريد حريتي ( باللهجه المحليه )

أ ر يــــــد حـــــر يـــــــتـــــــي


المشهد الاول

هين أبوك ا خلفان ؟؟؟
أبوي سافر البحرين مع عمي سالم .
هوو عليهم متى سافروا ، كه انا قبل يومين شايف ابوك .
تو إنته تكذبني يا شايب سعيد ..
ما اكذبك ، بس انا كنت جايب حال ابوك حاجه ، عاد هو ما موجود ..خلاص
جيب الحاجه يا سعيد وانا رايح اعطيه إياه ..
كيف تعطيه وهو مسافر يا خلفان ؟؟
كيه هو بيرجع إن شاء الله ..
لا لا ... هذه امانه كبيره .. ما روم اعطي بيد الصغيرين
إسمعني زين يا سعيد ، انا ما ولد صغير ، وجيب الامانه ..
وانا اقولك مرة ثانيه ، هذه الامانه لازمن اناولها في يد ابوك بس .
ولنفرض إن ابوي مات ، كيه ما تسلمني الامانه بعد ؟؟
عاد إذإ أبوك مات وخاس في القبر ، بعدين يمكن أسلمك الامانه ..

( صوت من داخل المنزل )
أوه خلفان حالموا جالس تتجادل مع الناس ؟؟
هوو عليك يا خلفان ، هذا صوت ابوك مسعود، وانته تقول هوه مسافر يا كذاب ؟
هاذا ما ابوي ... يمكن شبحه ، لأن أبوي يوم سافر ما شال شبحه معاه !!
شبحه يا الملعون ... سير نادي على ابوك ..

( جاء مسعود عند الباب ومعه ولده خلفان )
تو إنته حال مو مستخبي يا مسعود ؟؟؟
عليكم سلام بالاول ، وبعدين انا ما مستخبي ، انا جالس في السبله .
عقب حال مو ولدك إقول إنته مسافر للبحرين ؟؟
إنته تعرف ولدي يتمصخر على الناس يا سعيد ..
لا ابوي انا ما اتمصخر ، إنته بو قايل لي إذا جا الشايب المخرف سعيد قُله
إنك مسافر للبحرين ..

مته أنا قايل لك هذا الكلام يا كذاب .؟؟
الله اكبر منك يا مسعود ، أكلت القوازي وتو جالس تتماطل ، ما باغي
ترجع حقي ..
يا شايب سعيد ، انا طلبت منك مهله كمن شهر .
وانا صبرت عليك يا مسعود واجد ، وهذه بروه حالك من المحكمه ، لازم ترد لي
القوازي في إسبوع ، وإلا أبيع بيتك ومزرعتك وأسترد حقي ..

عاد انته ما ترضى فينا يا شايب سعيد ..
شيب الله رأسك انا بعدني ما شايب يا مسعود ، وما تكرر هذه الكلمه .
إن شاء الله يا ابو الشباب يا سعيدو ، خلينا نتفاهم ..

التفاهم هو بو قلت لك ، إلا إذا ما ناوي تروح السجن ، كان تعرف مو هيه
غايتي ومرادي ...
انا عارفنك يا سوسة الشيب ، باغني ازوجك بنتي مريومو أو تخليني ابات في البخار.
عقب زين وحدك قلت هذا الكلام ، وانا من جانبي اتنازل لك عن كل الدين بو عليك.

خلاص با انا خذيت شور البنت وبا زوجك بنتي ، لأن ما قادر ارد الدين بوفوق رأسي ، الله إسامحك يا سعيد ، البنت عمرها 12 سنه وانته فوق السبعين ..

من قايل لك انا فوق او تحت السبعين ، انا بعدني شباب ، الله ناعم علي بالصحه .

متى باغي العرس يا سعيد ؟؟؟
بكره يا مسعود تعال المزرعه عندي وشيل مهر الغاليه مريوم ، وبعد ثلاثة ايام أجىء وانقلها عندي في بيتي بو في المزرعه ...


( ذهب الشايب سعيد منتصرا )

( المشهد الثاني )
سمعيني يا زوجتي شمسه ، الشايب سعيد جيه عند الباب وهددني إذا ما رجعت قوازيه ، رايح إخليني أخيس في البخار او شارط أزوجه من مريومه وهو رايح
يتنازل عن القضيه وعن الفلوس ، تو إنتي دبريني مو العمل ؟؟؟

انا قلت لك من قبل يا مسعود إن هذا العجوز ما هين ، بس إنته ما سمعت كلامي ، تو ذوق المر من هذا المخرف سعيدو ..

أقولش نتوكل ونعطيه مريوم ، ما في غير هذا الحل ..

تو إنته ما تخاف من رب العالمين ، مريوم عمرها 12 سنه وهذا العجوز عمره فوق الثمانين ... هذا ظلم

لا ظلم ولا عدل هذا نصيبها ، وبعد كمن يوم إموت الشيبه وتورث هيه الريالات ، مو باغيه أكثر ... المهم جهزى البنت .. الرجال ينقلها ورى بكره ..

( تم الزواج السريع )

(المشهد الثالث )
( في مركز الشرطه )

المحقق : تفضل الشايب سعيد مو عندك ؟
سعيد : باغي اسوي بلاغ سرقه وهروب على زوجتى مريوم بنت مسعود ، فرت
من البيت من إسبوع وشلت معاها 150 قرش ، ما عارفين هين طفرت !!
المحقق : يمكن سارت عند حيانها ..
سعيد : لا لا .. حتى همه ما عارفين لها ظل ، غابت .. بلعها الشيطان الاسود .
المحقق : ما عليه بندور عليها ... بس عطنى صورتها واوصافها ..
سعيد : خذ هذه صورتها ..
المحقق : ( بعد تفحص الصوره ) انا باغي صورة زوجتك ، ما صورة بنتك
سعيد : مو تقصد نوبه إنته ، هذه هيه مريوم زوجتي ..
المحقق : كم عمرها ؟؟؟
سعبد : مو إخصك إنته عمرها ... إنتو شغلتكم تدوروا عليها بس ...
المحقق : ما عليه يا شايب سعيد بندور على بنتك ، آسف أقصد زوجتك ..
سعيد : مته اعاود عليكم ؟؟؟
المحقق : إذا لقيناها بنهمكم وحدنه ... تو سير بيتكم ..

( بعد سنه بالتمام )
في مركز الشرطه

المحقق : نحن قبضنا عليكى في الحدود وإنتي كنتي با غيه تسافري الى دبي .
مريوم : هذا صحيح ، بس ما اظن إني سارقه شيء ولا ممنوعه من السفر ؟
المحقق : بس عليش بلاغ من زوجش الشايب سعيد ، إنتي هربانه من
بيت زوجش وسرقتي قوازيه ...
مريوم : هذا الكلام صحيح ، بس ما قدرت اعيش مع عجوز عمره ثمانين سنه ، وانا طفله عمري ذاك الحين 12 سنه ، وفوق هذا إشغلني كما بالبشكاره في مزرعته، اما القروش هيه قروشي انا ، حقي من مهري ..
المحقق : بس إنتي كنتي زوجته ، كان المفروض تطلبي الطلاق ، مايصير تهربي .
مريوم : كيف اطلب الطلاق وهو ماسك على ابوي دين كبير
المحقق : وتو كنتى تريدي الهروب الى دبي
مريوم : نعم ، كنت باغيه اروح دبي مع سيف ونتزوج هناك ونعيش هناك .
المحقق : هذا غلط كبير ، إنتي على ذمة رجل غير
مريوم : هيوه ، بس الظروف تجبر الواحد على الغلط
المحقق : والحين مو ناويه تسوي
مريوم : بو كاتبنه الله هوه بيصير
المحقق : تعرفين هين زوجش الشايب سعيد تو ؟؟؟
مريوم : لا ما عارفه اكيد في بيته
المحقق : حظك زين ، إن زوجش مسكين توفى من شهرين
مريوم : فكه ، إغيب الظالم ..
المحقق: مع موت زوجش السابق ، تلغى القضيه ولكن مالش حق في الميراث
مريوم : ما باغيه حته قرش اسود ، باغية حريتي فقط
المحقق : إنتي حره ، سيري حيت ما باغيه ...
مريوم : شكرا حضرة الضابط ... انا سايره دبي واتزوج من سيف ولد عم سعيد
المحقق : هذه حياتك انتى حره ...


عبدالعزيز بن علي البلوشي
  مادة إعلانية
  #2  
قديم 02/09/2010, 09:23 AM
صورة عضوية حمد المخيني
حمد المخيني حمد المخيني غير متصل حالياً
عضو نشيط
 
تاريخ الانضمام: 09/04/2009
الإقامة: تحت العشرين قريبا من القمة
الجنس: ذكر
المشاركات: 167
افتراضي

رائعة تلك المشاهد عبدالعزيز خصوصا لهجتك المميزة ,,

عندي بعض الملاحظات البسيطة
النهاية لم ترضيني كقاريء , كان من الاولى أن تتحسف على النعمة عوضا عن تفضيلها لحريتها التي ضمنتها أصلا بمجرد وفاة الشايب ,,, .. كما ان المحقق ليس له الحق في منعها من الميراث طالما انها على ذمت الشايب ,


شكرا لقلمك اخي
__________________
(( وماذا
....قد يَضِيرُ الشمسَ ؟ ..

....إنْ هُمْ
....أغلقوا الشُّبّاكْ ؟ ))

أحمد بخيت
  #3  
قديم 02/09/2010, 10:19 AM
عبدالعزيز علي البلوشي عبدالعزيز علي البلوشي غير متصل حالياً
عضو نشيط
 
تاريخ الانضمام: 16/09/2008
الإقامة: سلطنة عمان
الجنس: ذكر
المشاركات: 607
افتراضي

اقتباس:
أرسل أصلا بواسطة حمد المخيني مشاهدة المشاركات
رائعة تلك المشاهد عبدالعزيز خصوصا لهجتك المميزة ,,

عندي بعض الملاحظات البسيطة
النهاية لم ترضيني كقاريء , كان من الاولى أن تتحسف على النعمة عوضا عن تفضيلها لحريتها التي ضمنتها أصلا بمجرد وفاة الشايب ,,, .. كما ان المحقق ليس له الحق في منعها من الميراث طالما انها على ذمت الشايب ,


شكرا لقلمك اخي
اشكرك اولا على المرور الطيب
ثانيا ملاحظاتك على راسي
بس فكرة بداية القصه إني كنت اريد أسويها قصة طويله
ولكن لأسباب خاصه اختصرتها الى هذا الحد
لأن الوقت لم يسعفني
وشكررررك مرة اخرى
 

أدوات الموضوع البحث في الموضوع
البحث في الموضوع:

بحث متقدم
أنماط العرض

قواعد المشاركة
ليس بإمكانك إضافة مواضيع جديدة
ليس بإمكانك إضافة ردود
ليس بإمكانك رفع مرفقات
ليس بإمكانك تحرير مشاركاتك

رموز لغة HTML لا تعمل

الانتقال إلى

مواضيع مشابهه
الموضوع كاتب الموضوع القسم الردود آخر مشاركة
.. عفوا أريد حريتي السياسية !! سيدة الزهور سبلة السياسة والاقتصاد 51 28/01/2010 10:04 AM
معاني بعض الكلمات باللهجه العمانيه‏ مستنجد السبلة العامة 41 27/04/2009 03:58 PM
تعلم اللغه الانجليزيه باللهجه الخليجيه الرميسي سبلة ترويح القلوب 15 26/04/2009 10:22 AM
مطلوب مقاطع صوتية باللهجه العمانية de rossi سبلة الهواتف النقالة 11 06/04/2007 03:41 PM



جميع الأوقات بتوقيت مسقط. الساعة الآن 03:22 AM.

سبلة عمان :: السنة ، اليوم
لا تمثل المواضيع المطروحة في سبلة عُمان رأيها، إنما تحمل وجهة نظر كاتبها