|
مصيبة حقيقية في الصحراء العمانية
السلام عليكم ورحمة الله وبركاته... (قصه واقعية) أرجو من الجميع قراءة الموضوع للآخر............. جايبلكم موضوع أشكي فيه المعاناة والمذلة اللي مريت فيها أو مرينا فيها نحن ك شباب عمانيين نلهث وراء كل شركة طالبين اي وظيفة نبتدي فيها مشوار طويل إسمه بناء المستقبل .... من أيام الثانوية نحلم بوظيفة في الصحراء من كثر ما نسمع من الشباب انه الواحد لو تحمل حرارة الشمس والمكدة بيحقق حلمه ويكون نفسه بسرعة خيالية تقول( تجارة في الحرام) ع حسب الوصف... اوين ما تصرف شي البر؟؟ لحد ما خلصنا الثانوية بدون مجموع طبعا .. نصحونا أهالينا نلتحق بوحدة من ذي الكليات عاندنا (أوين باغي أطلع الليسن واشتغل وأكد ع نفسي وأطلع سيارة) مهم اشتغلنا مال مشي الحال ع قولتهم.. 120 و160 والأمل في الصحراء باقي.. مرن 4 سنوات وأنا من شغلة لشغلة الراتب يروح حال البترول والرصيد وتصليح السيارة وسستم وغيرة... ونص الشهر الجيب ينبح ماشي فلوس.. قبل 4 أشهر بالتحديد بدأ الحلم يتحقق شوي شوي.. سمعت عن شركة تريد موظفين قلت أروح أحقق حلمي.. رحت قدمت أوراقي وسبحان الله بدون واسطة وبدون شي اتصلوا فيني بعد 3 أيام تقريبا... قلت غريبة هالشركة أول مرة يحصل معي كذاك.. عاد أنا بديت أفكر في المستقبل وغيره و و و و..... استعديت وخذيت كل شي أحتاجله هناك.. ورحت ف باص نظام الشركة: 28 يوم عمل في الصحراء 14 إجازة الراتب: 280 مايزيد واحتمال ينقص موقع الشركة في الصحراء: بعد مرمول طريق ترابي(جرجرة) ب90 كيلو 3 ساعات بالباص تحملنا مشقة الطريق والغبار وغيرة ف سبيل الحلم..فرحانيين.. كنا 21 شخص. الشركة تختص في التنقيب عن النفط.. ما كنا نعرف طبيعة العمل.. قلنا نتحمل إيش نسوي ؟؟ ع الأقل نرجع لأهالينا محملين بالذهب والمال!!!!! مر الشهر تقول سنة والله مافي شخص يتحمل .. عذاب بشتى أنواعه تشوفه هناك.. ما كأننا فبلادنا يعاملوك كأنك هندي إختفى كل الكلام العسل والحنك بعد توقيعنا للعقود ووصولنا للمعسكر السكن كرفانة صغيرة يناموا فيها 4 أشخاص ما تاخذ خصوصيتك أبدا.. قلنا عادي تراه صحراء.. الدوام من س 5:30 فجر إلى س 6 المغرب كله مشي من الصباح لين المغرب محمل الكيبلات فظهرك وتمشي مسافة 21 كيلو رايح كان وزني 85 (أتمرن حديد لاه) هع هع.. في خلال إسبوعين فقط نقصت 6 كيلو ملف مرفق 381432 ما أكذب عليكم هذا الشي أكيد من المشي لمسافات طويلة والشمس تصفعك اللي يغمى عليه واللي يطيح من العطش واللي ينقع ظهره من التحميل يرموك ف سيح ماله نهايه.. (أعزكم الله) إللي يريد يقضي حاجته يشوفله أقرب جبل يندس وراه.. ويتنظف بقفاز.. فطورك عبارة عن دال وخبز وحبتيين جبن..تاخذه الفجر وتاكله س8 بارد يدقك لوعان كله غبار وتراب.. وأحيانا ماشي فطور بحجة انه الماي مخلص.. والغدا نفس الشي عيش بارد وصالونة هنود باردة مع الغبار وبرتقالة وحدة من الجوع تصير ضرابة أحيانا ع البرتقال وتحمل إذا تريد تشتغل وإذا تكلمت انته مطرود هذا شعار الشركة..نرجع للمعسكر منهارين القوى ميتين من الجوع خايسين بلا حدود.. ما تفكر إلا في النوم.. ملف مرفق 381432 الطامة الكبرى/ الإرسال ماشي أبدا ولا تفكر فيه لا تواصل مع العالم الخارجي .. لاتعرف شي عن أهلك ولا يسمعوا عنك شي.. شهر كامل بدون ما تعرف شي عن أهلك..غم أحيانا تفكر.. تقول أنا ايش سويت فحياتي علشان اتعذب كذاك.. اشخاص تفوتهم وظائف حكومية ووظائف أحسن بسبب الإرسال. قبل ما أطلع من الشركة فية شخص حصل فرصة يتصل لأهله يطمن عليهم المسكين تفاجئ إنه أبوه متوفي من 10 أيام حته أهله عاتبوه ماشايفين الحاله اللي نحنا فيها.. لا إتصال إضطراري ولا غيره.. حاطيلك هاتف ثابت حال رنة بس وانتة وحظك إذا حصلت دور لأنك واحد من 500 عامل يريد يستخدم الهاتف أقل شي تحصل 18 عماني و6 باكستانية صافين طابور ينتظروا الدور والغم رنة بس.. (يعني تتصل في الرقم اللي تريده وتتكلم 5ثواني تقوله اتصل بسرعة ويتسكر) ولازم يفوتك العشا إذا تريد تستخدم الهاتف.. لأنه الميز مفتوح من س7 إلى س8:30 .. وممنوع تاخذ أكثر من مرة أو تزيد تاخذ عشاك بارسل للسكن.. العشاء: حدث ولا حرج)) أنا أعرف أطبخ أحسن ..هذا كله لا شي مقارنة مع المصائب الموجودة هناك من: التدخين العادي أكثر من شربهم للماء تدخيين الحشيش عيني عينك لا رقابة تذكر أحيانا انته نايم واللي جنبك يدخن ويلف حشيش قدامك أشياء فحياتنا ما شفناها تحصل قدام عيوننا .. والخمر يشربوه تقول ديو (عادي) المصلى محطوط للدعاية. لا صلاة ولا عبادة ( يمكن 23 من 500) محافظين ع صلواتهم. باستثناء صلاة الجمعة(مستحيل) تقول إنك فبلاد ما مسلمة! العمل مستمر بشكل يومي حتى يوم الجمعة ممنوعة عليك الصلاة تكد في السيح كما الحمار في الشمس وإذا تكلمت انته مفصول ما تعرف تكلم من؟ إذا تروح للمسائيل (الكامبوسيه) وانته ما تسكر معهم وماتخالطهم ف أعمالهم السرية فلا حياة لمن تنادي.. أنطم واسكت.. إذا أصابك مرض لا قدر الله أو شي .. تروح للطبيب 70% إذا ما حصلته سكران بتلاقيه جالس يدخن خلف العيادة.. ولاتفكر في الإجازة الطبية مستحيل تحصلها تداوم يعني تداوم.. من غير الزواحف والعقارب إلي نشوفها هناك إللي تلدغه عقرب واللي يصيبه مرض ماتعرف ايش نوعه.. أقرب مستشفى من موقعنا كان مستشفى صلاله يبعد 70 كيلو (تخيلوا المعاناة) قرب الشهر من نهايته ونحنا نحمد ربنا انه بنرجع لبيوتنا سالمين فقط منقلبين سودين يعني لازم نبرز البطاقة الشخصية قدام باب البيت من نوصل.. كل يوم مر علينا في الشركة تقول شهر من العذاب اللي مرينا فيه شهر يناير كان أسوأ شهر من عمري,, فيه ذكريات مؤلمة جدا .. الشباب إللي كانوا معي كلهم ناويين يفنشوا لأنهم مثلي ما كانوا يتوقعوا الصحراء تكون بهالشكل المؤسف.. خصوصا شركات التنقيب من 21 شخص يبقوا 6 أو 9.. شهريا عند تبديل الشفت... مضطرين عليهم ديون أو أقساط.. والمستمرين الوحيدين في الشركة هم اللي سبقت ذكرهم والمدمنين ع المخدرات والحشيش وغيره... ومتحملين لأنهم في الصحراء ماخذين راحتههم لا شرطة تلاحقهم ولا تحريات... وسألت مرة واحد منهم ليش صارلك شهرين ما رجعت البلد؟؟ يقولي أنا هنا مرتاح,,, لما رحت البلد إنسجنت 20 يوم وهنا يوميتي بفلوس. أقوله صدقت.. ما صدقت أرجع لمسقط بلادي الحبيبة اللي فيها أهلي وربعي وكل معارفي.. وصلت مطار مسقط الدولي واستقبلني أخوي ,, انتزق لما شافني صاير كأني جيفارا شهر كامل لاحلاقة ولاشي.. ومسمر من الشمس.. حمدت ربي وشكرته ع وصولنا بالسلامة... مسقط/ تشوف أشجار تشوف شارع وجسور تشوف ناس في الطريق حتى لو ما تعرفهم تض بلهم هرن يسلموا عليك ... تروح السوق تتمشى تتسوق تاكل أكل نظيف من البيت أو من برع... بزر واحد تضغط ع الجهاز وتتصل لأي شخص حاب تكلمه ... تصلي جماعة والصلاة فأوقاتها.. والحمد لله ياخي أشياء ما تحس بقيمتها غير لما تنحرم منها.. الحمدلله أخيراً توفقت فوظيفة حلوة ومحترمة وراتبها أحسن من اللي أنذلينا عشانه.. (وفي مجال لتحقيق الحلم) في الأخير سؤال يطرح نفسه.. وين وزارة القوى العاملة والرقابة من نوعية هالشركات؟؟ ولا فالحين ف مسقط وبس؟؟؟ ياخي حرام من يتحمل تُهان كرامته وينذل لأبعد الحدود وهوه ف بلاده؟؟؟ وأسأله كثيرة تُستنتج من قصتنا الواقعية المروعة تطرح نفسها ؟؟؟؟ ترضيوا أبنائكم أو أخوانكم يشتغلوا في مثل هالشركات؟ على راتب ما يستاهل؟؟ ولا بتقولولهم صبروا نحنا بدينا من الصفر وشوفوا وصلنا وين؟؟ نصايح شياب., و هل تتوقعوا حلم الشاب العماني في الزواج والعيشة الحلوة ةالهنيئة وتكوين أسرة بيتحقق؟؟ الله يعين الشباب المتواجدين هناك لحين............ ادعولهم بالصبر .... الله يفرج كربتهم ان شاء الله أتمنى من الأخوة الأعضاء قراءة القصة كاملة ومشاركتنا ردودهم وآرائهم........ وتعليقاتهم بدون تخميس |
الله يعينكم
طرحت شكاوي كثيرة لأشخاص يشتغلوا بالصحراء بس لا حياة لمن تنادي شكرا لك |
بعض الشركات لاتتطبق نظام السيفتي في الصحراء
|
بعيد الشر هذه ما وظيفه على حسب وصفك ...موفق والله يستر
|
الله يعينك اخوي ارجو ان تصل الى الجهات المختصه :كاشخ:
انا لو مكانك دوووووووروووه اللي يداوم هناك الحمدلله دوامي وانا مرتاح فيه :كاشخ: |
الله يعينكم...تراهم يستغلون الحاجه
عسى فرج قريب |
الله يعينكم يا شباب
|
الله يعين الشباب
الواحد يحمد ربه مليوون مره لأنه عنده وظيفه الله يوفقك. |
الله يعينكم يا شباب
|
مشكورين أخواني/ أخواتي ع الردود ربي يوفق الجميع.....
والله إنها مأساه وبعد يطلبوا موظفين إذا تريدوا تسجلوأ |
والله صدقت انها مصيبه
المشكله المسؤلين جالسين فمكاتبهم وتحت مكيف ولا هامه من الي يكد ويكدح فالسيح عشان لاشي ربي يعين كل مضطر جالس فالصحراء الحمدلله لانك توفقت وارتحت ونسال الله انه يبدل الحال ويخلي كل مسؤول خاين ومرتاح مزرووع فالشمس تقليه وتصفدله لونه عشان يحسوا شوي:معصب: |
أتمنى ربي ينتقم منهم ويشتتبهم مثل ما عذبونا والله
|
لا حياه لمن تنادي
لا رقابه |
ذكرتني بالشهر اللي مر علي معاهم وكانه قرن
ازفت شركات الصحراء من كل النواحي هي شركات التنقيب عن النفط ما اقول غير الله يعينهم اللي يداموا هناك واللحمد لله على نعمته علينا كيف الجرفونه كنت تدفنها زين ولا طاف؟؟؟ههههه |
اقتباس:
شوا اسم الشركه |
ويسترن جيكو.........تسجل من الشركات المقاولة وعقودها لحين مع ثلاث شركات/
الرموز الوطنية و سالم عاجب وشهاب مسقط الحذر أخواني ثم الحذر... |
اقتباس:
زين بعد حصلت حد مر بتجربتي...أنا كنت في الباك نطوي الوايرات أسميها مذلة |
:كاشخ::كاشخ: على هذي الحالة انا انصح اللي يريد يخسس وزنه يروح حال ذي الوظيفة :كاشخ::كاشخ: |
انا زميلى كان يداوم بتركى للمشاريع بصحراء سائق ثقيل 28 دوام 10 اجازه طبعا يومين لطريق الباقى 8 ايام من الاجازه الحين طلع ما وده يرجع الصحراء |
أزيدكم من القهر إللي فيني لحد لحين ما استلمت باقي مستحقاتي من الشركة كل ما أطالبهم يقولوا بعد اسبوع ...
|
مساء الخير أخي
الله يعينك و يفرج كربتك. صحيح أن الشركة تعبانة بكل المقاييس من حيث السلامة والاكل والمعاملة.أنا بنفسي شفت الشباب لما يزرعوا الميكروفونات في الارض بصراحة ما حالة في عز الظهيرة وفي عز الصيف يهيسوا. الشباب معكم ما على يد وحدة و كل واحد فالح يضرب الغرشة حسب قولك لهذا السبب الشركة ما راح تتغير ولا تتوقع مستقبلا تروح للاحسن بسبب الشباب.عادة الحشيش منتشرة في الصحراء للاسف لا حسيب ولا رقيب وأنا شخصيا أعرف حد من الأهل يداوم في هذي الشركة و حالته النفسية تعبانة. عموما لا تيأس عزيزي وربك كريم و حاول تتعلم الشغل و تاخذ خبرة وبعدين يصير خير ما دام نيتك طيبة ربك الكريم ما ينساك. أهم حاجة لا تنجر في الاشياء اللى يعملوها و خليك مع الاشخاص الصالحين. عموما تحياتي لك بالنجاح والله معك |
اقتباس:
|
اقتباس:
|
اقتباس:
تسلم أخوي...مشكور عالنصيحة أنا توظفت فمكان ثاني ومرتاح الحمدلله.. أهم شي أكتسبت خبرة من الصحراء والله يفرجها ع الشباب العمانيين اللي يعانوا هناك |
بس اللي اعرفه شي وظائف زينة ومريحة بعد هناك والا شو يسويوا اللي يشتغلوا في المكاتب والا شي عندهم عدة وظائف ..؟:متفكر: اقصد اصحاب الكليات والجامعات .. |
ما شاء الله عليك اخوي بأسلوبك
عيشتنا الموقف صراحة مذلة وفي بلادنا بعد ولا شي مراعاة للدين والقيم الله خلصك من هذاك الشغل الله يعينهم الي بالصحرا |
اقتباس:
|
اقتباس:
لا مو معقولة ..:مستغرب: لأني سمعت شغلهم في المكاتب .. |
اقتباس:
ماكنت أعرف الحالة هناك بالضبط كيف ... وأحمد ربي إني عشت التجربة وتخلصت من فكرة الصحراء من بالي نهائيا... |
اقتباس:
بس الشركة إللي اشتغلت فيها معاي شباب عندهم شهادة الصف الرابع الإبتدائي ومايكتبوا (أُميين):مستغرب::مستغرب::مست� �رب: وجديدين بعد وشغلتهم أريح من شغلة كثيرين |
| جميع الأوقات بتوقيت مسقط. الساعة الآن 07:21 AM. |
Powered by: vBulletin Version 3.8.11
Copyright ©2000 - 2024, Jelsoft Enterprises Ltd.
لا تمثل المواضيع المطروحة في سبلة عُمان رأيها، إنما تحمل وجهة نظر كاتبها