مساعدة ضرورية- مشكلة في جير أوتوماتيك - مازدا 626
 

هلا بالاخوان
عندي مشكلة في سيارتي خصوصا عندما تكون السرعة من 80 الى 120. يعني الجير يفضي و يسوي صوت مثل الزر. طعبا هذا في الجير الرابع رحت بعض الجراجات و بعضهن قالولي انه الجير خربان و بعضهن قالوا سنسرات الجير خربانة فالحين ماعارف مو المشكلة. قلت يمكن الجير خربان و اذا شريت واحد فقيمته الجديد يمكن 500 ريال و المستعمل يمكن 80 ريال و اذا السنسرات خربانة فيمكن اشري سنسرات جديدة بقيمة 50 ريال او اقل. بس انا ماعارف المشكلة تو و متحير مو اسوي.
نو سيارتي : مازدا 626
قوة المحرك:2000 سي سي
الموديل:2000
فاريد مساعدة من الاخوان اذا عندكم اي اراء و افكار حول المشكلة و ياريت يكون الرد سريع لان السيارة اتدخل الفحص قريب في خلال شهر 2 و اذا ماصلحتة اتتكنسل السيارة و السيارة عزيزة علي مطلعنها فحص و صراحة منذ سنة 2002 الى 2009 السيارة عازتني رحتبها الامارات و السعودية عدة مرت. و ختربت بسبب واحد من الاهل شل السيارة لما كنت مسافر للعمل و تعرفوا الشباب يوم تعطيوهم سيارة تخميس و تفحيط و هذا بو خرب السيارة.
وشكرا لكم

ردوا ياجماعة الخير

بخصوص فحص الشرطة عادي ما راح يكشفو الخله

عموما أتوقع الجير يحتاج تبديل بالكامل

والاسعار أتوقع ما أكثر عن 150 ريال

بس هل من الممكن تبديل القطع الخربانة ايضا في الجير. يعني يمكن الجير ما خربان كله فاذا بدلت القطع الخربانة يمكن تكون قيمة التصليح اقل ولا ما توافقني الراي اخوي

كيف شباب تراه ما حد رد علي

أخي أفضل تبدل الجير لأنه الجير جدا حساس وماسهل واحد يبطله ويرجعه مثل ماكان لأنه حصلت عندي فموستانج موديل 95 وبعد ما دفعت 70 ريال عشان السنسرات رجع الجير نفس ما أهو.

خذلك جير مستعمل بشرط انك تفحص الآيل وتشوف لونه اذا كان أسود أسود لا تاخذه واذا حصلت الآيل مايل للشفاف أو أحمر فأمورك ضبط وأفحصه نظريا شوفه ما مرتض او منهمص وأخذ جير نفس موديل سيارتك مايقولك هذا مال 2006 ويركب نفس الشي.ولاتنسى تطالب بضمان لو أسبوعين

الله يوفقك ويسهل عليك أخي

اتفق معه .

موفق خير

مشكورين يالاخوه والله ما قصرتوا.

آخوي إلجير يتفكك قطعه قطعه ويرد آحسن من أول بعد
لآ تمشي على أنه حسآس مآ حسآس
آهم شيء إلميكآنيكي شآطر

صعب تحصل ميكانيكي شاكر وفي نفس الوقت رخيص يا اخوي
لتقيد الجير الاوتوماتيك

انصحك بشراء مستعمل

والبركة في الوارد ونعمة الـhalf cut راح تحصل جير رخيص لسيارتك.


بالنسبة لفحص المرور فلا توجد هناك اي مرحلة من مراحل الفحص تبين لهم الجير 4 يبدل أو لا

الشيمة لا تقترح لهم هذي النقطة فيكون الفحص النظري في الشوارع لان اكثر من نصف سيارات عمان لن تجتاز الفحص :)

مرحبا اخي العزيز
المشكلة الي في سيارتك قطعة تركب في الجير أسمها صحن جلتش هذا المشكلة سيارتك لما تعمل كذا يكوت الصحن كلتش متأكل ولآزم تنزل الجير ، أذا تريد تتأكد لما يفضي الجير وقف السيارة وأنزل بتشم ريحه تطلع من السيارة كأنه شي محترق .

مرحبا أخي
مشكلتك داخل الجير والقطع تسمى (الكلتشات )
التصليح يكلف أكثر من 300

مرحبا اخي العزيز
بالنسبه بأول فحص للجير الاتوماتيك تغير الزيت مع الفلتر مع مراعات فحص ضخ الزيت داخل الجير
بالنسبه لتوقعي فأغلب الشباب يهملون تغير فلتر الجير الأوتوماتيك وعطل سيارتك شبيه بذلك
عطل السنسرات به تعقيد اكثر من الزر والفاضي
الكمبيوتر له دور ايضا بحدوث عطل مشابه
*اخي العزيز لتجنب المخاسير الزائده
غير الزيت مع الفلتر وافحص السياره عل الكمبيوتر
وشكرا

عزيزي نصيحتي تفحص السياره بالكمبيوتر ..ترا اذا السنسر خربان يبين و اذا مابين هذا يعني عندك مشكله في الجير نفسه..

صديقي عنده نفس المشكلة
بس حبيت اسأل اذا الجير الاوتوماتيكي خربان وتريد تبدله
ممكن تغيره بالكامل وتحوله الى عادي؟؟؟