سبلة عمان - شوف اخرة مهندس طيران عندة دبلوم ما حرام الجزء الاخير صورة

قصت صاحبي وحقيقية 100%
انا شاب ابلغ من العمر 24 سنة حبيت اكلمكم عن حكايتي شوووي
واريدكم تحكم بنفسكم انا الغلطان او من الغلطان؟؟وليش ؟؟ومن السبب؟؟ ولحد متى؟؟؟ انهيت الدراسة في الثانوية 2003 وبعد سنة من االبحث عن العمل اتجهت
لدراسة فالاردان هندسة طيران اخذت الشهادة ورجعت لبلادي الحبيبة عمان طبعا دبلوم هندسة طيران....
ومن الفرحة ما قادر اصدق نفسي اخيرا بشتغل ...اخيرا بيتحقق كل احلامي اخيرا ببداء اكون نفسي....تقدمت لوظيفة فالطيران
العماني لانة حلمي من انا صغير ادوام فالطيران العماني...قدمت اوراقي وانتظر كل يمو اسمع فلان ود فلان توظف وفلان كان معاي ودرجاتة ما تاهلة انة يدوم قلت حظة حلو وربك يحبة تخيلوا سنتين ارجعهم محد رد علي تمنيت بس بالغلط يتصل يقولوا عندك اختبار او مقابلة ماشي
ابدا لحد ما تعبت وضاقت بي الدنيا طبعا لما تقولهم اريد ادخل اقابل مسئول مورد البشرية يقول مسشغول او اجتماع او طالع اجازة؟؟؟
او عندة حد...ع هذا الحال والناس 2 باتصال وهمة داخلين لا يريدلهم موعد او اي حاجة ربك كريم...المهم بعد طول انتظار
فدمت ف دبي اتصل فيني قلت لا ما اريد بلادي اولى فيني ...

نسخت السيفي مالي 100 نسخة وزعتة ع كل مكان يخطر فبالكم ولكن لا حياة لمن تنادي انا المهندس اللي عندي دبلوم هندسة..ما حصلت شغل
المهم من ضمن الاماكن اللي اتصل فيني شركة دعاية واعلام فرحت قلت بيطلعني بدعاية مال شامبو او ديو...لكن للاسف قال تريد تدوم معانا تسوي دعاية فالدكاكين تكلمهم ع صابون بحر والدوام شفتين...
قالت حج نفسي هندسة هاة صارت هندسة صابون بحر المهم ضليت فالدوام 3 اشهر كل ما يمر حد يعرفني او من اهلي او اصدقاي او حد اعرفة اخلي نفسي جاي اشتري حاجة من الدكان وطلع برع شردة ورجع بعد ما يروح
طبعا دوامي بعيد عن بيتنا ...لحد ما خلص العرض قالوا بنسوي دعاية فمكان شوية غلط مراقص وبارت وكانت هالمرية دعاية عن الزجاير...اقول حلو يا ابو هندسة زجاير..
طبعا طلعت من الدوام لانة الغلط غلط ..الوظيفة 2 كانت لا تضحك علي اسوق باص اشل طلاب وطالبات الكلية ...روووح يا ابو هندسة طيران من مهندس لسايق...
بعد فترة جات اجازة الكليات وين بتروح يا ابو هندسة ؟؟؟
اتصل فيني وكالة بيم قالوا تعال عندك مقابلة رحت وشليت اوراقي وانا طاير من الفرح...من وصلت قالوا انتة شو تريد تشتغل؟؟قلت اي شي قال انتة مقدم ع اساس مهندس رديت علية حتى عامل المهم اشتغل
قالي انا بطرشك عند زميلي اسمة فلان فلان روحلة وبيشغلك تمام رحت عند هالشخص قالي انا استحي اشغلك مكانيكي وهندي يكون مسئول عنك...
قلتلة عادي انا راضي قالي سمحلي...وطلعت من عندة ,,وقلت ربك كريم..
بعد فترة خذيت تكسي قمت اتكس ليل ونهاررووووح ياابو هندسة اخر شي تكسي...
قلت اللة كريم بعد فترة التكاسي زاد فعمان وما شي شغل تخيل ايش سووويت قمت ابيع معدن..؟؟؟حالتي وحالة المحشش وحدة كل ما اوصل هناك احصل حد من المحششين سارق ويرات او مجمع حديد وجاي يبيع ولما يشوفني ود خالتي او صديقي ويش جاي تسوي هنا هذا ردي؟ سمع العيارة هذا المصنع مال عمي وانا جاي اشوف الوضع وما يعرف الحالة اني جاي ابيع معدن حالي من حالة...

المهم بعد فترة خلص الحديد والمعدن اللي كنت اعرف اماكنهم ويش الحل يا ابو هندسة المعادن ههههه قصدي طيران...قلت بروح ادووم سايق فمال معدن فاليوم 8 ريالات اهم شي ما يروح عند بيتنا او منطقتنا...وكل يوم اوصل الدوام اتلثم كاني بنجالي....
بكمل قصت حياتي بكرة...

اشكر الجميع ع الردود الحلوة وبكمل قصت حياتي اللي انا اعتبرة حلوة
بس ارجع اسالكم من السبب؟؟؟ وليش؟؟؟ولحد متى؟؟؟؟
المهم داومت سايق شاحنة فالمعبيلة للعلم كان اغلب السايقين اللي معاي من المتقاعدين عن العمل …وكنت من الصباح اطلع عشان الباكستاني اللي متفق معاة ما ينتظر اذا تاخرت بيشوف اي حد غيري المهم كان الدوام حماس وتعب وكسر ظهر كانت شغلتي اسوق واضرب هارن بيب بيب معدن معدن معدن المهم الريوق كان شاي وكيك ع حسابهم ومر اول اسبوع ع خير ولكن واللة انهم يطلع فلوس يشتري برخيص ويبيعة دبل وفي 2 اسبوع اشوف الباكستاني بدء يخليني ادوم اكثر عن اللي متفقين علية قلت اصبر والصبر حلو كنت فبالي اقول حج نفسي يمشي زعتور وهوة مسرور يا ابو هندسة المهم لحد ما صار 9 يوم وكل يوم الصباح تجي هالغنية فبالي صبح الصباح يا حلو ياجميل والجيب ما فية ولا ملين وضحك ع نفسي قالي بنروح منطقة قريب من بيتنا قلتلة لا ما بروح قالي انتة ما تنزل قلت ما اروح المهم جلس يصرخ علي قلتلة ما بروح ما عرفت كيف افسرلة قلتلة بيت صديقتي هنا ما اريدة تشوفني ادوم فهالشاحنة المهم بعد مشادة كلامية قالي رجع المصنع وعطني 3 ريالات مال نص يوم وطلعت من هالشغل…والحين يا ابو هندسة طيران وين بتروح؟؟؟؟ماشي شغل…قلت ربك ما كاتبلي نصيب وبصبر المهم فهذا الوقت خلاص تعبت نفسيا قلت ايش تسوي ايش بسوي المهم كنت كل يوم اشتري جريدة اشوف اعلانات الجريدة وشفت اعلان مطلوب سايق باص لروضة فالموالح وانا طبعي احب الاطفال قلت بتصل فية هلا اخوي معاك فلان الفلاني شفت اعلان فالجريدة سايق باص قالي ايوا المهم سالني اسئلة ومن ضمن الاسئلة ايش من الموهلات عندك قلتلة دبلوم هندسة طيران ضحك ههههههههه قلتلة ليش تضحك قالي تتكلم جد قلتلة ايوا وما صدق الاخ وقال رسللي شهايدك عن طريق الفاكس قلتلة اوكي المهم خبرت الوالدة انة حد من اصدقائي كذا كذا كذا صايرلة وطلب منة الشخص يرسل شهايدة ع الايميل ضحكت هههههههههههههههه من قلبة فديتة ما عارفة انة جالسة تضحك ع حالت ولدة …المهم من القهر ما رسلتلة ……
….فيوم من الايام اتصل حد من اصحابي قالي بقولك حاجة تفضل قال انا سالت عنك ليش انتة حالتك كذا منحووووس قلتلة سالت من؟؟؟؟ قال شخص لة علم فهالمواضيع؟قلتلة قصدك معلم قال ايوا وقالي اذا تريد تعرف السبب وتشوف حل تعالي نروحلة طبعا موقع المعلم مطرح ..طبعا انا اكرة هالسوالف بس الفضول خلني اروح اول مرة اجرب هالطريق اول ما وصلت عندة قالي انتة فلان بن فلانة قلت ايوا طلعلي ورق مشخبط فيهم يمين يسار المهم جلس يسالني عن ناس معروفين من منطقتنا فلان فلان صديقي وفلان فلان صديقي كل وفلان فلان توا بيجي وانا اقول بدا فالكذب وبالفعل اشوف سيارة الشخص اللي يتكلم تمر قدامي لانة ما شاللة عندة خير اتفاجات معقولة هلانسان يتعامل مع هالاناس؟؟؟المهم بكمل القصة بكرة وبخبركم بالتفصيل ايش صار معاي مع المعلم…

:نطوط:
السوال؟؟من السبب؟؟وليش؟؟ولحد متى؟؟؟... المهم يا حلوين لما شفت سيارة هالشخص كنت ادعي من ربي ما يجي ويشوفني مع المعلم شكلة حس فيني وراح...
سالني المعلم رحت عند معلم 2 قبلي قلتلة لا ...قالي انزين خبرني مشكلتك قلتلة انا صارلي فترة ادور شغل ما محصل كل ما احط شي باسمي ما يصير او يتكسر او يتعرقل وما اعرف شو السبب قام المعلم يحرك شفايفة وعندة مسبح طووويل ويحرك المسباح لحد ما اشتد المسباح.. .ورد علي قالي تتذكر السيارة الفلانية مالك والسيارة الثانية مالك عطاني اللون قلتلة ايوا اذكرهم قالي من هذيك الايام وانتة مضروب بعين ومسويلك عمل... تفجات كيف عرفت اني مطلع سيارتين فنفس الوقت ولونهم؟؟؟ وسكت المعلم قلتلة من اللي مسولي هالشي قال ما قدر اقولك بس ناس قريبين منك...الفضول بدء يضبحني انزين بنت ولا ولد...رد علي المعلم بنتين ووولد...قالي بنت ويمكن يصير من اهلك....
انصدمت اهلي عشان كذا يا مهندس الطيران انتة ما متوفق ...رد المعلم والحرز مدفون في اخر المقبرة ..
و2 في بيتكم عند الشجرة الفلانية وصفلي الباب من وين الدريشة وكيف الطريق لحد الشجرة وكل كلامة لوصف صحيح..سكت هوة وسكت انا قالي تريد افكلك اياة قلت ايوا
قالي انتة وين تريد تدوم قلتلة الطيران العماني قالي سالني ما تريد ديوان من سالة عرفت انة ما سهل قالي تعالي بكرة وجيب معاك زعفران وسالني تريد تشتغل قالت ايوا قالي جيب اورقك بكرة وبتشتغل قبل ما يخلص الشهر فرحت وقلت خلاص انحلت مشكلة المهندس الفاشل...
ومن الفرحة طلعت 20 ريال وعطيتة وقلتلة بكرة بجيك...
رحت البيت وطاير من الفرح بديت احلم من جديد من بيت ومن سيارة ودراجة وسفرات...قالت كل شي بيتحقق اخيرا...
رجعت البييت وفرحان حدي انتظرت اليوم الثاني رحت من اول الصباح عند المعلم قلتلة هذا الزعفران وهذا 5 سيفيات عشان اذا ما صار هنا يصير فمكان 2 قالي تعالي بعد ساعتين...رحت ورجعت بعد ساعتين حصلت السيفي مربوط بخيط ابيض مخللي ماي فغرشة صغيرة قالي شربة كل صباح وحاول تمسح كل جسمك بالماي وبعد اقل من شهر كل شي يصيرلك خير وقبل عن تعطي السيفي او تريد امورك ضبط قول يا مناهوا وردد هالكلمة وانفخ فوجة الشخص اللي تريد منة حاجة وبتصير امورك حلوة من الفرح عطيتة 40 ريال ورحت ع طول الطيران العماني ومن داخل لحد ما عطيتهم السيفي ورجعت واقول الكلمة ونفخ فوجهم لحد ما رجعت السيارة ورحت البيت قلت خلاص بصير اخيرا مهندس يا حظي...هههههههههه
وفاليوم الثاني قررت اتاجر بالسيارت من مهندس لتاجر سيارت يا حظك... رحت سوق الحرامية وشتريت سيارة وصاحب السيارة اصر انة يريد الرقم رغم انة سلطة قلتلة تمام التقينا بعد العشاء فالمرور قلت اليوم بجرب حظي مع الرقم اللي بيطلعلي وجلست اردد الكلمة ونفخ فوجة الشرطي والشرطي يشوف ومصنف مالة هذا ينفخ فوجهي ... والمفاجة الكبراء كم تتوقع طلعلي الرقم؟؟؟؟
بكمل بكرة القصة ؟؟؟؟تتوقع رقم حلو ولا سلطة؟؟؟
:نطوط::عيار:

هلا يا حلوين رجعتلكم عشان اكمل قصتي مع الهندسة الطيران...او هندسة الصابون او المعدن
طلع الرقم بس للاسف طلعلي رقم سلطة قلت معلية يمكن بعدة ما من توا يبدى مفعول المعلم
وطلعت وقالت يمكن انا قلت الاكلمة غلط واتصلت فالمعلم خبرتة الموضوع قال مفروض تخبرني قبل عن تروح قلت اوكي
المهم وستمر الحال من مهندس طيران الي تاجر سيارات كل يوم فالصناعية او في سوق الحرامية او سوق الجمعة ابيع واشتري
سيارات فيوم قالت لنفسي لحد متى كذا ما تعرف هالسيارة تنباع او لا وما تعرف كيف السوق مرة فوق مرة تحت قلت بروح
ادور شغل يكون معاي راتب ثابت اتصلت فحد من الاهل قلتلة اريد ادوم معاك فالمكتب قالي تشرفنا فاي وقت فرحت ولما رحت المكتب
عندة قالي توا انتة موة دارس بالضبط قلتلة هندسة قالي هندسة وما حصلت شغل قال تريد تشتغل فالطيران العماني ومن بكرة قالت ايوا
وفرحت قالي كم ***** المهم طوفتة لانة طلبة كان شوي غريب سالني كم تريد راتب ؟؟؟قلتلة اللي انتة تشوفة زين قالي طبعا سيارة عليك و دوامك من 8 لحد
1 ومن 1لحد6 وفي اوقات بليل لاني كنت مندوووب وامرات يحتاجني اجيب عمال من مطار قلت اوكي عطاني اورق قالي سير سوي عقد عمل رحت وما انتبهت ع الراتب
كم تتوقع اقل حاجة؟؟؟150 ريال ما حرام والسيارة وبترول علي ؟؟؟ طنشتة وما رجعتلة مال لهذي الدرجة عاد انا عماني عندي جواز احمر
ما بنجالي..100 ريال يكفني حال 5 شهور...من هالصفعة اللي حصلتة من عند الاهل كرهت اليوم اللي رحت درست فية الهندسة.. ومرت الشهر وبعدة لا حياة لمن تنادي
ومر شهرين لا في اتصال ولا هم يحزنون وطلع المعلم نصاب ومحتال وضرب فلوس ع الفاضي
المهم ما راح اطول عليكم اكثر لانة اخوي شاف الموضوووع وجالس يتنازع معاي
المهم جلست ارجع نفسي ليش انا كذا وليش انا منحوس قلت لازم في شي غلط فيني والصراحة كنت مقصر فصلوتي
وقلت فنفسي يمكن اني بعيد عن ربي عشان كذا واللة وقمت اصلي كل الصلوات فالمسجد واقراى القران وما مر اسبوع ولا اتصل فيني الطيران العماني تعال معاك اختبار فرحت فرح ما طبيعي
وجاء يوم الاختبار اختيارنا وقال بيرد علينا بعد اسبوع طبعا ماكنت متفائل واجد لانة مستحيل حد يتذكر اشياء درسة من زمان..
وطبعا عطوني طااااااااااف وانا خلاص عرفت انة مستحيل بدوام فهالمكان..المهم يا حلوين احد من الاهل رتبلي شغل فمعرض سيارت ودومت فترة فالمعرض ..وفوقت الدوام اتصلوا فيني طيران الشرطة
وقالوا تعال عندك اختبار المهم اختبارت وقال كل شي اوكي بس السبيلنج عندك ضعيف ..
وقررت اعدل من نفسي وها انا الحين اكافح من اجل شهادتي وادرس في نيوزلندا ...
والسلام ختااااااام ومشكوين الغالين ع المتابعة
ودايمن خليكم قريبين من ربكم عشان ربي يوفقكم...
1- ما حرام اغلب العمانين يدوم فطيران الامارت او الاتحاد؟؟يعني الطيران العماني ما اولى بهم؟؟؟
2-اذا كان فينا شي غلط اولغتنا ما تساعد او اي شي 2 ليش طيران الاتحاد وغيرة يوافق علينا؟؟؟

هذي صورتي وقت التخرج عشان الاخوان اللي ما مصدقين...