المساعد الشخصي الرقمي

عرض الإصدار الكامل : ماهي الخطوات الدقيقة للنجاح في اختبار البراميل


أبو محمد و أحمد
03/06/2009, 07:02 PM
السلام عليكم ورحمة الله

رغم كل المحاولات التي قمت بها إلا انني لازلت افشل حين ادخال السيارة في منطقة البراميل

هل هناك خطوات معينة لادخال السيارة من اليمين و الشمال ؟

بوركتم

ام السوس
03/06/2009, 07:13 PM
عليك بالموازنة مع الزاوية للشباك الخلفي للسيارة من اليمين والشمال .
يعني يجب ان تكون زاوية شباك السيارة عندما تنظر للخلف على زاوية اول برميل وبعدها تبدأ بالرجوع البطيء مع التعديل البطيء ايضا .
اتمنى ان يكون قصدي مفهوما .
جربها اكثر من مرة قبل الفحص .
واذا نجحت بعد هذا ارجو ابلاغي ع الخاص ( بليز )

AL-AUFI
03/06/2009, 07:13 PM
طلع البراميل وحط بدالهم غرش عرق زموته

نصيحتي غير المدرب.

ولازم تشوف من المرايا اللي افوق من راسك عشان لما تكون كل الدرامات ظاهره بالجامه اللي فوق فقط يحتاج تشوف على جهه وحده (باستخدام المرايا الجانبيه) ولا تربش عمرك وتلفلف السكان وتحايس بنفسك من يمين ومن يسار.

دكتور مجنون
03/06/2009, 07:20 PM
طلع البراميل وحط بدالهم غرش عرق زموته

ذكرتني بعصير زموته :حزين:
وبخصوص اخوي
مثل ما قالت ام السوس
اول ما تشوف اول درام خلاص عدل السياره وارجع بشكل عادي :)
وبعدين تعال ماشي عندك معلم يعلمك 1؟:مستغرب:

علي بن راشد الغنامي
03/06/2009, 07:32 PM
أنا أنصحك تأخذ المعلومة أخت أم السوس كلامها صحيح 100% ,,,,,,,
أنا نجحت من تراي الأول والحمد الله ،،،،

الباحث ع المعرفه
03/06/2009, 07:35 PM
جرب حطلك نقطه مركزيه افتراضيه ومن توصل بحيث انك من توصل
لهذي النقطه تقوم بالاستداره بشكل كلي
وبعدها تعدل سكانك

الرجل المهم
03/06/2009, 07:45 PM
المسألة تحتاج الى تقدير من السائق..

ارجع بالسيارة للخلف واستخدم ( البريك + كلتش.. يعني لا تضغط على البترول)..
الى البراميل واكسر ( لف المقود بالكامل) قبل مسافة تقديرها بطول السيارة..
واستمر في الرجوع للخلف وعندما ترى البراميل التي على جانبي السيارة..
عدل السكان ( ارجعه الى المنتصف)..
وارجع ببطء وعندما ترى السيارة قريبة من اي برميل حرك المقود باتجاهه.. وهكذا

اهم شي العملي.. خخخخخخخخخخخخخ

وطني مخلص
03/06/2009, 07:49 PM
تتمرن زين وتعرف شو أسباب أخطائك وتدرسها وتفهمها وتتجنبها
بدل من تجرب صابت أو خابت
يعني تفهم لما تدور المقود كثير شو يصير وكيف تتجه السياره
وأصلا من تكون خلفية السياره دخلت بين أول برميلين ضبط المقود
لتكون الإطارات مستقيمه وأرجع وإنت مغمض عيونك:)

لعيونك وبس SSS
03/06/2009, 08:00 PM
عليك بسحر

ALOOHA
03/06/2009, 08:19 PM
تتمرن زين وتعرف شو أسباب أخطائك وتدرسها وتفهمها وتتجنبها
بدل من تجرب صابت أو خابت
يعني تفهم لما تدور المقود كثير شو يصير وكيف تتجه السياره
وأصلا من تكون خلفية السياره دخلت بين أول برميلين ضبط المقود
لتكون الإطارات مستقيمه وأرجع وإنت مغمض عيونك:)


هذا الكلام صحيح
خل عندك قياساتك الخاصه ، وراح تتقنها بالتدريب والممارسه

لكن سالفة "" اول برميل والجامه الخلفيه وهالسوالف "" صراحه كانت تدورلي براسي
وما كنت أضبطها أبدا
لحد ما ضبطت أموري بنفسي

تيتانيوم
03/06/2009, 08:29 PM
انا بعطيك الطريقة الصحيحه
لما تكون فالجهه اليمنى انت وراجع شوف البرميل الثاني من الصف الثاني من الجامة الصغيرة (المثلث) ولما يطلع لك بالكامل من البرميل الاول فالصف الاول اوقف ولف السكان بالكامل ع جهة اليمين وادخل وشوف المرايا اليمين ومن تشوف بين جسم السيراة والبرميل الاول مسافة 10 سم اوقف وخلى السكان سيده ودخل مؤخرة السيارة بين البراميل وبعدين لف السكان بالكامل جهة اليمين وطالع المرايا اليمين والشمال ومن تشوف السياره سيدة اوقف وحط السكان سيده وادخل
وهذي الطريقة مضمضمونة

تيتانيوم
03/06/2009, 08:36 PM
واذا كنت راجع من جهة اليسار طبق نفس الطريقة بس من يطلع البرميل الثاني فالصف الثاني من جهة البرميل الاول من الصف الاول اوقف ولف السكان بالكامل جهة اليسار
‏(بس هالمره شوف البرميل الثاني من الجامة الكبيرة من الباب الي خلفك مش من الجامة الصغير *المثلث*
واذا مافهمت تواصل برقمي فالملف الشخصي وبخبرك
لان ادري ان شرحي غامض بعض الشي

أبو محمد و أحمد
04/06/2009, 03:13 PM
الاخت الكريمة ام السوس

بارك الله فيك يا اخيتي , تدرين انا مشكلتي هي انني حركت السكان من شفت اول برميل من الصف الثاني , دخلت في البرميل مباشرة من حركت السكان و الله المستعان ..

AL-AUFI

شكرا لك اخي الكريم , مشكلة مدربي انه يعطيني تعليمات باستمرااااااااار هو اللي يحركني دون ان يسمح لي بالاعتماد على نفسي .. يمكن اغيره بعدين .. بجرب طريقتك ان شاء الله

دكتور مجنون ..

شكرا لك .. ايوا فيه بس مو كل مدرب يدرب زين ..

الرجل المهم

شكرا لك يا اخي

الى البراميل واكسر ( لف المقود بالكامل) قبل مسافة تقديرها بطول السيارة..


المسافة و التقدير هي مشكلتي .. ما اعرف اقدر و ابغى اعرف طريقة تساعدني في التقدير الدقيق لان البراميل عملية دقيقة ..

وطني مخلص ..

جزاك الله كل خير ,

لعيونك و بس

تكفى , لا تجيب طاري السحر عندي خوفة من هالكلام ..

Alooha

بارك الله فيك , صراحة احس انا لازم اتبع الخطوات و إلا دخلت في البرميل !

تيتانوم

بارك الله فيك , عطيتني تعليمات دقيقة باتخيلها و افهمها و اطبقها على ارض الواقع

و دعواتكم

سفير العرب
04/06/2009, 03:23 PM
يوم تسمع الدقة وقف وما عليك منهم..:ضحك: (أمزح)

شوف نصائح الشباب..ما قصروا معك..وإن شاء الله تنجح

تاجرة شباصات
04/06/2009, 10:31 PM
أتمنى الي يعرف يخبرنا

هبوب
04/06/2009, 10:45 PM
الله يوفقك: لان الراميل صعبة /لان في واحد عندنا اسمه مالديني سوا عشرين تراي في البراميل وبعده تيس ..

alameer0
04/06/2009, 11:38 PM
اتصل بي انا بخبرك

غربة زمن
05/06/2009, 12:30 AM
الموضوع جا على الوتر الحساس 3 ترايات براميل خخخخخخخخخخ والله ما اعرف شو المشكلة ف التدريب انجح 100% ف التراي ارسب 100% بس لييييييييييييييييييييييش والله ساعتها الدموع بس تشتغل وتسود الدنيا بوجهي وتجي الكأبة واليأس والاحباط ووووو
الله المستعان
بس يا دنيا ارحمينا شوي

Mercy
05/06/2009, 01:30 AM
ابوي الله يعين

يوم اخر
05/06/2009, 01:35 AM
ابوي الله يعين

ليش الاخت ماعندها ليسن :عيار:

LeeNa
05/06/2009, 01:53 AM
الله يساعدك:)

srs1000
05/06/2009, 02:13 AM
فية طريقتين وحده عن طريق المثلث والثانية عن طريق الخط...

البراميل سهله ما يبيلها شي بس أهم شي تعرف طريقة الدخول.
كما قالو الشباب غير المدرب أو حتى المدرب نفسه ما يعرف كيف يدخل من البراميل!!

غرفاوي
05/06/2009, 02:21 AM
والله نصيحتي انك تغير المدرب ولو باغي مستعد أعطيك مدرب كفو و يدرب لين لما تحصل ليسن ان شاءالله لو باغي راسلني على الخاص ..... :)

ثانيا : بالنسبة للبراميل و الصعدة . البراميل اكثر شي تنتبه عليه هو المرايتيت الي على يمينك و شمالك وكل ما حسيت ان الزاوية بين البرميل و السيارة ضيق حاول تسوي فراغ يعني افتح من الجانبين .... والصعدة عاد المفروض تتحكم ارفع الهاندبريك حطه على جير واحد ولا ترفع الكلتش بالكامل شوف المرايا الي على الشمال لو حسيت السيارة تتهزز دوس البترول و نزل الهاندبريك واتحذر لا تخلي السيارة تتطلع صوت منه ترا الشرطة بيرسبوك .... هذا كل الي عندي و اخر شي حاول نحنك مع الشرطي :) وشكرا

300zx
05/06/2009, 03:13 AM
صح كلام اخي الغرفاوي.. المدرب له دور ف التعامل والخبره اللي عنده ,,, وعلى فكره السياره بعد تساعد.. تعلم على سياره مش عريضه مثل ايكو حلوه ومناسبه .. والمرايا الجانبيه يكونن فوق يعني ما يلحقن ف الدرامات وبالتوفيييييق

منير البلوشي
05/06/2009, 03:33 AM
حسن شي تدرب ف ايكو
اكثر مرونه ف الدرامات

تدعي الابداع
05/06/2009, 03:49 AM
اذا قدرت لنفسك بتنجح أما تسمع طريقة هذا وذاك ماجاي تخلص
ومادايما تضبط صف ثاني وبرميل اول
والله في حياتي ماطبقت سوالفهم لا في التدريب ولا في التراي كنت أقدر بروحي
بس عاد مانجحت من الاو ل خخخخخخخ خذيته في الثاني

lion@heart
05/06/2009, 09:12 AM
أهم شئ يكون فيك بارض وماتستعجل

الناصري505
05/06/2009, 09:19 AM
على طاري الدرامات والترايات فالهند مايحطو درامات يحطو بدلها حديد 6 وبصراحه اشوفهم حتى لعور بينجح لأن قطر الحديده بحدود قطر اصبعك

غربة زمن
05/06/2009, 07:00 PM
اعتقد الدرامات واخوانها (سخافة) ومالها داعي بس يصعبوا علينا واصلا ما اشوف عليها تطبيقات كثيرة واللي يقول عشان المواقف وما ادري شو تراك بتتعلم بدون درامات وبتفهم
يا ليت يفكونا منها ما منها فايدة يكفي نتعلم ف الشارع وخلاص

تغاريد الفرح
05/06/2009, 07:17 PM
ماعرف أشرح كتابة :كاشخ:
بس الله يعينك ويساعدك ... ركز زين قبل عن تلف الستيرنج ... ومثل ما قالولك البعض ركز من خلال خط الشباك الخلفي ... والله أشياء نسيناهم :كاشخ: ...

ابو العرافة
05/06/2009, 07:44 PM
الله يعينك

الخط الأحمر11
05/06/2009, 08:21 PM
الأخوان ما قصرو...خبروك بالأسرار....

يالله عاد ما عندك عذر لازم تنجح...وتيييبلنا البقلاوه....:مرتاح:

...............

شمة عمان
05/06/2009, 08:32 PM
الله يعينك .............
والله ان البراميل عذاب لحد ما تنجح .............
انا نجحت ف ثاني تراي .... وكنت اضبط مثل ما قالت الاخت ام السوس ع الجامة الخلفية لما يضهر البرميل وهناك كتابه ع الجامه الخلفية واحاول احط البرميل قدامها والف السكان كامل وادخل شوي وبعدي اعدله سيده وادخل وعاد لفه مرة ثانية وعدله وبتروح السيارة سيده .......
ومثل ما قال منير جامة الايكو الجانبية ما تضرب ف البرميل احسن تتعلم فيها ........

هامور
05/06/2009, 09:26 PM
نا بصراحة ما استعملت المرايا فالفحص قبلت راسي على وراء وشفت ونجحت
انا عندي حل حاول دائما تسوق ريوس
بس ماتسرع لايصورك الردار ريوس

شجن الأيام
05/06/2009, 10:07 PM
السلام عليكم ورحمة الله

رغم كل المحاولات التي قمت بها إلا انني لازلت افشل حين ادخال السيارة في منطقة البراميل

هل هناك خطوات معينة لادخال السيارة من اليمين و الشمال ؟

بوركتم

أنا ناجحه بعد ست ترايات درامتن .. يعني أخر وحده يمكن تنصحك :كاشخ:

ولد القاضي
05/06/2009, 10:20 PM
صاحبي في طريقة حلوة:كاشخ:

خلي المعلم مال السياقة يحك لحيتة لما تكون في المكان المناسب ...